• અમદાવાદ શહેરમાં આગની ઘટનાનો મામલો

• એક જ દિવસમાં પાંચ સ્થળો પર લાગી આગ

• આગની ઘટનાથી અફરાતફરીનો માહોલ સર્જાયો

• 8 જેટલા ટુ વ્હીલર આવ્યા આગની ચપેટમાં

• વટવા જીઆઈડીસીમાં પણ ભીષણ આગથી દોડધામ

• ફાયર લાશ્કરોએ આગ પર મેળવ્યો કાબુ

અમદાવાદમાં 5 અલગ અલગ વિસ્તારમાં આગ લાગવાની ઘટનાઓ બની હતી. જેમાં ચંડોળા અને વટવા ખાતે આવેલી ઝૂંપડપટ્ટી, પ્રહલાદ નગર ખાતે આવેલા વિનસ એટલાન્ટિસ, વટવા જીઆઇડીસી ફેઝ-4ની કેમિકલ ફેક્ટરી અને બાપુનગર વિસ્તારમાં કારમાં આગ લાગી હોવાની ઘટના બની હતી.

અમદાવાદ શહેરમાં એક જ દિવસમાં આગ લાગવાની પાંચ ઘટનાઓ પ્રકાશમાં આવી હતી.શહેરના પ્રહલાદનગરના વિનસ એટલાન્ટિસ નામની બિલ્ડિંગના પાર્કિંગમાં આગની ઘટના સામે આવી હતી. આ આગની જાણ થતાં જ ફાયરની ટીમ તાત્કાલિક ધોરણે ઘટના સ્થળે પહોંચી હતી. જોકે, આગની ઘટનામાં વાહનો બળી ગયા હતા. વાહનોમાં લાગેલી આગના કારણે તેનું સ્વરૂપ વિકરાળ બની ગયું હતું. ફાયર વિભાગ દ્વારા આગ પર કાબુ મેળવવામાં આવ્યો હતો.

પ્રાથમિક તપાસ મુજબ, આગ ભારે ગરમીને કારણે પાર્ક કરેલા ટુ-વ્હીલર માંથી લાગી હોવાનું માનવામાં આવે છે. પાર્કિંગમાં ટુ વ્હીલર પાર્ક કરેલા હોવાથી એક પછી એક 8થી વધુ ટુ વ્હીલર આગની ચપેટમાં ગયા હતા. જોકે સદનસીબે રોડ પરથી પસાર થતા રાહદારીઓ અને સ્થાનિક રહેવાસીઓ દ્વારા સમયસર જાણ કરવામાં આવતા અન્ય ટુ વ્હીલરોને ખસેડી લેવામાં આવ્યા હતા.

અમદાવાદ ફાયર અને ઇમરજન્સી સર્વિસીસને તાત્કાલિક જાણ કરવામાં આવી હતી અને આગને કાબુમાં લેવા માટે ટીમો ઘટનાસ્થળે રવાના કરવામાં આવી હતી. ફાયર ફાઇટરોએ આગને કાબુમાં લેવામાં સફળતા મેળવી લીધી છે. આ ઘટનામાં કોઈ ઇજા કે જાનહાનિના અહેવાલ નથી.

અમદાવાદની વટવા ખાતે આવેલી ઝૂંપડપટ્ટી વિસ્તાર અને વટવાGIDC ફેઝ-4માં આવેલી જયશ્રી કેમિકલ ઈન્ડસ્ટ્રીઝમાં ભીષણ આગ લાગવાની ઘટના બની હતી. કેમિકલ ડ્રમમાં બ્લાસ્ટ થયા બાદ ફેક્ટરીમાં આગ લાગી હતી. જેના કારણે આસપાસની 4થી 5 કંપનીઓ આગની ઝપેટમાં આવી ગઈ હતી.આ ઘટનાની જાણ થતાં ફાયર વિભાગના ચાર ફાયર ટેન્ડર ઘટનાસ્થળ પર પહોંચ્યા હતા.અને આગ પર કાબૂ મેળવવાના પ્રયાસો શરૂ કર્યા હતા.

આમ અમદાવાદમાં એક જ દિવસમાં ચંડોળા અને વટવા ખાતે આવેલી ઝૂંપડપટ્ટી, પ્રહલાદ નગર ખાતે આવેલા વિનસ એટલાન્ટિસ, વટવા જીઆઇડીસી ફેઝ-4ની કેમિકલ ફેક્ટરી અને બાપુનગર વિસ્તારમાં કારમાં આગ લાગી હોવાની પાંચ ઘટનાઓ બની હતી.