• ભરૂચ ક્રાઇમ બ્રાન્ચને મળી સફળતા

  • પાનોલી નજીકથી કન્ટેનર ઝડપાયું

  • વિદેશી દારૂ ભરેલ કન્ટેનર ઝડપી પાડ્યું

  • કન્ટેનર ચાલકની પોલીસે કરી ધરપકડ

  • રૂ.68.47 લાખનો મુદ્દામાલ જપ્ત

ભરૂચ LCB એ સેલવાસથી સેમસંગ ઉપકરણોની આડમાં સંતાડીને અંકલેશ્વરના પાનોલી લવાયેલ કન્ટેનરમાંથી દારૂનો ₹15.27 લાખનો જથ્થો ઝડપી પાડી કાયદેસરની કાર્યવાહી હાથ ધરી છે.
ભરૂચ જિલ્લા નવનિયુક્ત પોલીસ વડા અક્ષય રાજ મકવાણાએ ચાર્જ સંભાળતા જ લોકલ ક્રાઇમ બ્રાન્ચે દારૂ ભરેલું કન્ટેનર પકડી પાડ્યું છે. સેલવાસથી કેન્ટેનરમાં રાજસ્થાનનો સંતોષ પ્રજાપતિ સેમસંગના 86 ટીવી, ફ્રીજ અને કોમ્પ્યુટર કિંમત રૂપિયા 33.10 લાખના સામાન સાથે દારૂ ભરી નીકળ્યો હતો.દારૂનો આ જથ્થો કન્ટેનર ચાલકને વોન્ટેડ ગોપાલસિંગ ઉર્ફે ગોપી રાજપૂતે ભરી અપાવ્યો હતો.
પાનોલી જીઆઈડીસીમાં વલસાડ પાસિંગની બલેનો કારનો ચાલક આ દારૂ લેવા આવવાનો હતો. પાનોલી જીઆઈડીસીમાં કન્ટેનરને કોર્ડન કરી ડ્રાઈવરની ધરપકડ કરાઈ હતી. કન્ટેનરમાં સેમસંગના ઉપકરણોની આડમાં સંતાડેલ દારૂ બિયરની અધધ 4629 બોટલો મળી આવી હતી. LCB એ ચાલકની કુલ રૂપિયા 68.47 લાખના મુદામાલ સાથે ધરપકડ કરી બલેનો કાર ચાલક, ગોપી રાજપૂતને વોન્ટેડ જાહેર કર્યા હતા.