અંકલેશ્વર : મોબાઈલમાં કાર્ટૂન બતાવવાના બહાને 11 વર્ષીય બાળકી સાથે શારીરિક અડપલાં કરનાર પાડોશીની ધરપકડ...

ભરૂચ જિલ્લાના અંકલેશ્વરમાં 11 વર્ષીય બાળકીને મોબાઈલમાં કાર્ટૂન બતાવવાના બહાને લઈ જઈને અડપલા કરનાર પાડોશીની પોલીસે ધરપકડ કરી કાયદેસરની કાર્યવાહી હાથ ધરી છે. મળતી માહિતી અનુસાર, અંકલેશ્વરના એક વિસ્તારમાં પરિવાર સાથે રહેતી 11 વર્ષીય બાળકીની માતા પોતાના કામથી 14મી ઓગષ્ટના રોજ રાત્રીના બહાર ગઈ હતી. આ સમય દરમિયાન 11 વર્ષીય બાળકી અને તેનો ભાઈ બહાર રમતા હતા, ત્યારે તેમના પાડોશીએ બાળકી અને તેના ભાઈને કાર્ટૂન બતાવાના બહાને પોતાની ઇકો કારમાં બેસાડ્યા હતા.

જે બાદ પાડોશીએ બાળકીના ભાઈને મોબાઇલ પકડાવી બાળકીને ઉંચકીને ઇકો કારમાંથી બહાર લઈ અંધારામાં ઉભી રાખી બાળકી સાથે શારીરિક અડપલા કરી રહ્યો હતો. આ સમયે અચાનક માતા આવી જતા બાળકી દોડીને માતા પાસે પહોંચી ગઈ હતી. પાડોશીની હરકતોથી ગભરાઈ ગયેલી બાળકીએ સમગ્ર ઘટનાની જાણ તેની માતાને કરતાં તેણે આ અંગેની જાણ પોતાના પતિ અને પરિવારના સભ્યોને કરી હતી, ત્યારે બાળકીના પિતાએ અંકલેશ્વર શહેર બી’ ડિવિઝન પોલીસ મથકે ફરિયાદ આપતા પીઆઈ વી.યુ.ગડરિયાએ ગુનાની ગંભીરતા નોંધીને તેમના સ્ટાફે ગણતરીના કલાકોમાં જ નરાધમને ઝડપી પોકસો એક્ટ હેઠળ દુષ્કર્મનો પ્રયાસ તેમજ એટ્રોસિટી એક્ટ હેઠળ ગુનો નોંધી વધુ તપાસ હાથ ધરી છે.