પેટ્રોલ અને ડીઝલ 10 રૂપિયા સુધી થઈ શકે છે મોંઘુ, પરંતુ સરકાર કિંમતોને રોકવા માટે કરી રહી છે વ્યવસ્થા

સરકાર એક્સાઈઝ ડ્યુટીમાં ઘટાડો કરીને રૂસો-યુક્રેન યુદ્ધથી કાચા તેલના ભાવમાં લાગેલી આગને ઓલવી શકે છે. કેન્દ્ર સરકાર દ્વારા પેટ્રોલ અને ડીઝલ પર વસૂલવામાં આવતી એક્સાઈઝ ડ્યુટીમાં ઘટાડા અંગે નાણા મંત્રાલયમાં મંથન શરૂ થઈ ગયું છે. યુદ્ધના કારણે છેલ્લા 7 વર્ષમાં પ્રથમ વખત ક્રૂડ ઓઈલની આંતરરાષ્ટ્રીય કિંમત 100 ડોલર પ્રતિ બેરલને વટાવી ગઈ છે. તેની સીધી અસર દેશની પેટ્રોલિયમ માર્કેટિંગ કંપનીઓના નાણાકીય સ્વાસ્થ્ય પર જોવા મળી શકે છે.

આંતરરાષ્ટ્રીય સ્તરે ક્રૂડ ઓઈલના ભાવમાં વધારો થવા છતાં પેટ્રોલ અને ડીઝલના છૂટક ભાવમાં છેલ્લા કેટલાક સપ્તાહથી વધારો થયો નથી. ઘણી આંતરરાષ્ટ્રીય એજન્સીઓએ જો યુદ્ધની સ્થિતિ ચાલુ રહી તો ક્રૂડ ઓઈલની કિંમત 120 ડોલર પ્રતિ બેરલ સુધી જવાની આગાહી કરી છે. સૂત્રોના જણાવ્યા અનુસાર, પેટ્રોલિયમ માર્કેટિંગ કંપનીઓ વર્તમાન સંજોગોમાં પેટ્રોલ અને ડીઝલની છૂટક કિંમતમાં ઓછામાં ઓછો 10 રૂપિયા પ્રતિ લીટરનો વધારો કરવા માંગે છે. આનાથી છૂટક ફુગાવો વધશે, જે જાન્યુઆરીમાં 6 ટકાને પાર કરી ગયો છે. આવી સ્થિતિમાં નાણા મંત્રાલય પેટ્રોલ અને ડીઝલ પરની એક્સાઈઝ ડ્યુટી ઘટાડવા પર વિચાર કરી રહ્યું છે.

ગયા વર્ષે દિવાળી પહેલા વડાપ્રધાન નરેન્દ્ર મોદીએ પેટ્રોલ પરની એક્સાઈઝ ડ્યુટીમાં પ્રતિ લીટર 5 રૂપિયા અને ડીઝલમાં 10 રૂપિયા પ્રતિ લીટરનો ઘટાડો કરવાની જાહેરાત કરી હતી. હાલમાં કેન્દ્ર સરકાર પેટ્રોલ પર 27.90 રૂપિયા અને ડીઝલ પર 21.80 રૂપિયા પ્રતિ લીટર એક્સાઇઝ ડ્યુટી વસૂલે છે. બે દિવસ પહેલા નાણામંત્રી નિર્મલા સીતારમણે કહ્યું હતું કે ક્રૂડ ઓઈલની વધતી કિંમત ચોક્કસપણે સરકાર માટે એક પડકાર છે અને સરકાર સમગ્ર પરિસ્થિતિ પર નજર રાખી રહી છે.