58 વર્ષના થયા કિંગ ખાન... અડધી રાતે મન્નતની બહાર ચાહકોની ભીડ સાથે દિવાળી જેવો માહોલ.....
બોલિવૂડના બાદશાહ એટલે કે શાહરૂખ ખાન આજે પોતાનો 58મો જન્મદિવસ ઉજવી રહ્યા છે.
બોલિવૂડના બાદશાહ એટલે કે શાહરૂખ ખાન આજે પોતાનો 58મો જન્મદિવસ ઉજવી રહ્યા છે. આ અવસર પર ફેન્સની સાથે સેલેબ્સ પણ તેને અભિનંદન આપી રહ્યા છે. ઈન્ડસ્ટ્રીના કિંગ ખાનના જન્મદિવસ પર દર વર્ષની જેમ આ વર્ષે પણ તેમના ઘર મન્નતની બહાર અડધી રાત્રે ચાહકોની ભીડ એકઠી થઈ હતી અને ચાહકો તેમના સુપરસ્ટારની એક ઝલક મેળવવા માટે બેતાબ હતા.
મધરાત સુધીમાં હજારો ચાહકો તેના બંગલાની બહાર એકઠા થઈ ગયા હતા. ફેન્સનો પ્રેમ જોઈને શાહરૂખ પોતાની જાતને રોકી શક્યો નહીં અને તેણે પોતાના બંગલાની બાલ્કનીમાં આવીને ફેન્સનો આભાર માન્યો. હવે શાહરૂખ ખાનની આ તસવીરો વાયરલ થઈ રહી છે. આ અવસર પર શાહરૂખે પણ પોતાનો સિગ્નેચર પોઝ આપીને ચાહકોની ખુશી બમણી કરી હતી. આ દરમિયાન તે બ્લેક ટી-શર્ટ, કેપ અને ગોગલ્સ પહેરેલો જોવા મળ્યો હતો. પુત્રી સુહાનાએ ઇન્સ્ટા સ્ટોરી પર તેના બાળપણના ફોટા શેર કરીને શાહરૂખને શુભેચ્છા પાઠવી હતી. ફોટો શેર કરીને લખ્યું- હું તને સૌથી વધુ પ્રેમ કરું છું. શાહરૂખ ખાનને જોઈને ફેન્સ પાગલ થઈ રહ્યા છે. તેના જન્મદિવસ પર વિવિધ શહેરોમાંથી ચાહકો તેને પોતપોતાની રીતે શુભેચ્છા પાઠવવા આવ્યા હતા. કોઈ તેમના બંગલાની બહાર મિઠાઈ, કોઈ ગિફ્ટ અને કોઈ ટી-શર્ટ અને મોટા પોસ્ટર લઈને ઊભેલા જોવા મળ્યા. આટલું જ નહીં, અડધી રાત્રે શાહરૂખના ઘરની બહાર ફટાકડા પણ ફોડવામાં આવ્યા હતા, જેનાથી દિવાળી જેવો માહોલ સર્જાયો હતો.
