ગુજરાતની 182 બેઠકો માટે 1621 ઉમેદવારો વચ્ચે જામશે ચૂંટણીનો જંગ
પ્રથમ તબક્કાની લિંબાયત બેઠક પર સૌથી વધુ 44 ઉમેદવારો સામે આવ્યા છે, જ્યારે બીજા તબક્કામાં બાપુનગરમાં 29 ઉમેદવારોએ ઝંપલાવ્યું છે.
ગુજરાત વિધાનસભા ચૂંટણીમાં ઉમેદવારોનું ચિત્ર સ્પષ્ટ થઈ ગયું છે. ગુજરાત વિધાનસભાની 182 બેઠકો માટે કુલ 1621 ઉમેદવારો મેદાનમાં છે. આપને જણાવી ગતરોજ બીજા તબક્કાની ચૂંટણી માટે ઉમેદવારી ફોર્મ પરત ખેંચવાનો અંતિમ દિવસ હતો. ઉમેદવારી ફોર્મ પરત ખેંચવાના છેલ્લા દિવસે 279 ઉમેદવારોએ ફોર્મ પરત ખેંચ્યા છે. બે તબક્કામાં યોજાશે ગુજરાત વિધાનસભાની ચૂંટણી.ગુજરાતમાં બે તબક્કામાં ચૂંટણી યોજાવા જઈ રહી છે.
પ્રથમ તબક્કાની 89 બેઠકો માટે 1 ડિસેમ્બરના રોજ મતદાન થશે, આ માટે કુલ 788 ઉમેદવારો ચૂંટણીના મેદાનમાં છે. જ્યારે બીજા તબક્કાની 93 બેઠકો માટે 5 ડિસેમ્બરના રોજ મતદાન થશે. બીજા તબક્કાની 93 બેઠકો માટે 833 ઉમેદવારો મેદાનમાં છે. આ અંગે વિગતવાર વાત કરીએ તો પ્રથમ તબક્કાની 89 બેઠકો માટે કુલ 1362 ઉમેદવારી ફોર્મ ભરાયા હતા. આ ઉમેદવારી ફોર્મ ચકાસણીમાં 363 ઉમેદવારી ફોર્મ રદ્દ કરાયા હતા. જ્યારે પ્રથમ તબક્કાની ચૂંટણી માટે ઉમેદવારી પત્ર પરત ખેંચવાના છેલ્લા દિવસે 211 ઉમેદવારી પત્ર પરત ખેંચાયા હતા.
હાલ પ્રથમ તબક્કાની 89 બેઠકો પરના 788 ઉમેદવારોના ભાવિનો નિર્ણય મતદારો કરશે. પ્રથમ તબક્કાની લિંબાયત બેઠક પર સૌથી વધુ 44 ઉમેદવારો સામે આવ્યા છે, જ્યારે બીજા તબક્કામાં બાપુનગરમાં 29 ઉમેદવારોએ ઝંપલાવ્યું છે. બીજા તબક્કાની 93 બેઠકો અંગે વિગતવાર વાત કરીએ તો બીજા તબક્કા માટે પક્ષ-અપક્ષ સહિત કુલ 1515 ફોર્મ ભરાયા હતા. ફોર્મ ચકાસણીમાં 403 ઉમેદવારોના ફોર્મ રદ્દ કરાયા હતા.
જ્યારે બીજા તબક્કા માટે 279 ઉમેદવારોએ ફોર્મ પરત ખેંચ્યાં છે. જેથી બીજા તબક્કાની 93 વિધાનસભા બેઠકો માટે 833 ઉમેદવારો મેદાનમાં છે. બીજા તબક્કાની 93 વિધાનસભા બેઠકો માટે 5 ડિસેમ્બરના રોજ મતદાન પ્રક્રિયા હાથ ધરાશે. બંને તબક્કાની ચૂંટણીનું પરિણામ 8 ડિસેમ્બરના રોજ આવશે.
