અમદાવાદ: વસ્ત્રાલમાં સોસાયટીના મેન્ટેનન્સની માથાકૂટમાં યુવક પર ફાયરિંગ, ગંભીર હાલતમાં સારવાર હેઠળ

અમદાવાદના પૂર્વ વિસ્તારમાં છેલ્લા 24 કલાકમાં ત્રણ બનવા બન્યા છે. જેમાં એક હત્યા, એક હત્યાની કોશિશ અને ફાયરિંગનો બનાવ બન્યો છે. જેમાં અમદાવાદના વસ્ત્રાલ વિસ્તારમાં યુવક પર ફાયરિંગનો બનાવ પ્રકાશમાં આવ્યો છે. યુવકને માથાના ભાગે ગોળી વાગતા તેને ગંભીર ઇજા થઇ છે. યુવકને સારવાર અર્થે હોસ્પિટલમાં ખસેડવામાં આવ્યો છે.

મળતી માહિતી મુજબ, વસ્ત્રાલ વિસ્તારમાં આવેલ રીગ રોડ પર આજે બપોરના સમયે વાત્સ્લ્ય હાઈટ ફ્લેટના મુખ્ય ગેટ પાસે ફાયરિગનો બનાવ બન્યો હતો. જેમાં ઈશ્વર ઠાકોર નામના યુવક પર ફાયરિગ કરવામાં આવ્યું હતું. પ્રદીપ રાજપૂત નામના શખ્સ દ્વારા આ ફાયરિગ કરાવમાં આવ્યું હતું. ઘટનામાં ઈશ્વર ઠાકોરને માથાના ભાગે ગોળી વાગતા ગંભીર ઈજાઓ પહોંચતા સારવાર અર્થે હોસ્પિટલ ખસેડવામાં આવ્યો છે. સોસયટીના મેન્ટેનન્સની માથાકૂટમાં આ ફાયરિંગ કરવામાં આવ્યું હોવાનું જાણવા મળી રહ્યું છે. મેનેજમેન્ટ બદલાતા આ મેન્ટેનન્સની માથાકૂટ થઈ હતી. જે માથાકૂટ છેલ્લા 8થી 10 મહિનાથી ચાલતી આવી છે. પરંતુ આજે બોલાચાલી ઉગ્ર થતા પ્રદીપ રાજપૂતે ઈશ્વર ઠાકોર પર ફાયરિંગ કર્યું હતું. હાલ તો આરોપીને શોધવા માટે પોલીસે પ્રયાસ શરૂ કર્યા છે.