• ડીસાના એક વિદ્યાર્થી સાથે થઈ ઓનલાઈન છેતરપિંડી

• લીંક મારફતે સસ્તામાં ગેમિંગ મશીન આપવાની લાલચ

• યુટ્યુબ લીંકમાં વિદ્યાર્થીએ રૂ. 9.97 લાખ ગુમાવવા પડ્યા

• સાયબર ક્રાઇમ પોલીસ મથકે નોંધાય છેતરપીંડીની ફરિયાદ

• પોલીસે રાજસ્થાનથી 4 શખ્સોની ઘરપકડ કરી તપાસ આદરી 

બનાસકાંઠા જિલ્લાના ડીસાના વિદ્યાર્થીએ યુટ્યુબની લીંક મારફતે ગેમિંગ મશીન સસ્તામાં લેવાની લાલચમાં રૂ. 9.97 લાખ ગુમાવ્યા હતા. છેતરપીંડીની ફરિયાદના આધારે સાયબર ક્રાઇમ પોલીસે રાજસ્થાનથી 4 શખ્સોની ઘરપકડ કરી વધુ તપાસ હાથ ધરી છે.

સોશિયલ મીડિયા અને યુટ્યુબની લીંક મારફતે અનેક લોકો સાયબર ફ્રોડનો શિકાર બનતા હોય છે. જોકે, સરકારની જાહેરાત બાદ પણ લોકો આવી લાલચમાં ફસાતા હોય છે, ત્યારે આવો જ એક કિસ્સો બનાસકાંઠા જિલ્લામાંથી સામે આવ્યો છે. ડીસા ખાતે રહેતા વિદ્યાર્થીએ ગેમિંગ મશીન સસ્તું આપવાની યુટ્યુબની લિંક મારફતે જાહેરાત જોઈ હતી. જે મશીન તેની કિંમત કરતા સસ્તા આપવાની જાહેરાત હતી, અને આ જાહેરાતને જોઈ વિદ્યાર્થીએ સસ્તામાં ગેમીંગ મશીન ખરીદવાની લાલચમાં રૂ. 9.97 લાખ રૂપિયા ગુમાવ્યા હતા.

રાજસ્થાનના હનુમાનગઢમાં રહેતા આરોપીઓ કે, જેઓ પણ વિદ્યાર્થીઓ છે અને હોસ્ટેલમાં રહીને અભ્યાસ કરે છે. આરોપીએ યુટ્યુબ લીંક મારફતે લોકો સાથે છેતરપિંડી કરવા માટે જાહેરાત લિંક બનાવી હતી, અને તેમાં તેમનો નંબર પણ આપ્યો હતો. આ લિંકમાં ડીસાનો વિદ્યાર્થી ફસાયો હતો, અને ગેમિંગ મશીન સસ્તામાં ખરીદવાની લાલચમાં આરોપીઓએ આ વિદ્યાર્થીના ફોનના એક્સેસ મેળવી લીધા હતા, અને ઓટીપી મેળવી રૂ. 9.97 લાખ ટ્રાન્સફર કરાવ્યા હતા. જોકે આ વિદ્યાર્થીના પિતાના એકાઉન્ટમાંથી રૂપિયા ઓછા થતા તેના પિતાને દીકરો સાયબર ફ્રોડનો શિકાર બન્યો હોવાનું માલૂમ પડ્યું હતું.

ત્યારબાદ વિદ્યાર્થીના પિતાએ સાયબર પોલીસ મથકે ફરિયાદ દાખલ કરાવી હતી. પોલીસે ટેકનીકલ એનાલિસિસ અને હ્યુમન સોર્સને આધારે આરોપીઓના લોકેશન મેળવ્યા હતા. જેમાં રાજસ્થાનના જયપુરથી જુગલ ભાગીરથ સુથાર, દીપક ભાગીરથ સુથાર, સુનિલ ઉર્ફે સેન્ડી જાટ અને પ્રદીપ જાટ નામના આરોપીઓને ઝડપી પાડ્યા હતા. અત્રે ઉલ્લેખનીય છે કે, ચારેય આરોપીઓ પણ વિદ્યાર્થી છે, અને તેઓ GPSC પરીક્ષાની તૈયારી કરી રહ્યા હતા. જોકે, પૈસાની લાલચમાં આ પ્રકારની લિંક બનાવી તેઓ છેતરપિંડી આચરતા કાયદાના ચુંગલમાં ફસાઈ ગયા હતા.