ભરૂચના નેત્રંગ પંથકનો બનાવ

રાજાકુવા ગામે દીપડાનો હુમલો

10 વર્ષીય બાળકીનું મોત નિપજ્યું

બાળકી ગામની સીમમાં બકરા ચરાવવા ગઈ હતી

પરિવાર પર આભ તૂટી પડ્યું

ભરૂચના નેત્રંગ પંથકના રાજાકુવા ગામે દીપડાના હુમલામાં દસ વર્ષથી બાળકીનું મોત નિપજતા ખળભળાટ જવા પામ્યો છે. રાજાકુવા ગામ ખાતે રહેતી 10 વર્ષીય લીલા કોટવાડિયા ગતરોજ મોડી સાંજના સમયે ગામની સીમમાં બકરા ચરાવવા ગઈ હતી તે દરમિયાન દીપડાએ અચાનક તેના પર હુમલો કરી દીધો હતો.દીપડાના હુમલાના કારણે બાળકી લોહીલુહાણ હાલતમાં થઈ ગઈ હતી અને તેને ગંભીર ઈજા પહોંચી હતી.જેના પગલે તેનું કરુણ મોત નીપજ્યું હતું. બાળકીના મૃતદેહને પોસ્ટમોર્ટમ અર્થે   નેત્રંગ આરોગ્ય કેન્દ્ર ખાતે ખસેડવામાં આવ્યો હતો જ્યાં ઝઘડિયાના ધારાસભ્ય રિતેશ વસાવા સહિતના આગેવાનો દોડી ગયા હતા અને બનાવ બાબતે વિગતો મેળવી હતી. ધારાસભ્ય દ્વારા નેત્રંગ વન વિભાગને દીપડાને પકડવા ઝડપથી કાર્યવાહી કરવા સૂચના આપવામાં આવી છે. આ તરફ વન વિભાગ દ્વારા ગામની આસપાસ પાંજરું ગોઠવી આદમખોર દીપડાને ઝડપી પાડવા પ્રયત્નો શરૂ કરવામાં આવ્યા છે. બાળકીના માતા-પિતા મજૂરી કામ અર્થે ગયા હતા અને બાળકી તેના દાદા સાથે રહેતી હતી ત્યારે દીપડાના હુમલામાં તેનું મોત નીપજતા પરિવાર પર આભ તૂટી પડ્યું છે.