અંકલેશ્વર : પ્રતિન ચોકડી પાસે રિક્ષા સ્ટેન્ડ પર જ વરસાદી પાણી ભરાતા હાલાકી,પાલિકાની ગટર લાઈનના કારણે સર્જાઈ પરિસ્થિતિ

• પ્રતિન ચોકડી પાસે રિક્ષા સ્ટેન્ડ પાસે વરસાદી પાણી ભરાયા

• પાલિકાની ગટર લાઈન ચોકઅપ થતા સર્જાઈ સમસ્યા

• વરસાદના શરૂઆતમાં જ રોડ પર પાણી ફરી વળ્યા

• પાણી ભરાતા રિક્ષા ચાલકોને હાલાકી વેઠવાનો વારો આવ્યો

• પાલિકા દ્વારા ગટર લાઇન સાફ કરવાની માંગ

અંકલેશ્વર પ્રતિન ચોકડી રિક્ષા સ્ટેન્ડ પાસે વરસાદી પાણીએ જમાવટ કરતા પેસેન્જરો સહિત રાહદારીઓએ ભારે હાલાકીનો સામનો કરવો પડી રહ્યો છે.પાલિકાની ગટર લાઈન ચોકઅપ થઈ જતા આ પરિસ્થિતિનું નિર્માણ થયું હોવાનું જાણવા મળી રહ્યું છે.

અંકલેશ્વર પંથકમાં વરસાદી માહોલ જામ્યો છે,અને વહેલી સવારથી જ વરસાદે ધબધબાટી બોલાવી છે,જેના કારણે જનજીવન પણ પ્રભાવિત થયું છે.બીજી તરફ પ્રતિન ચોકડી પાસે સવારના સમયે ધંધા રોજગાર માટે આવતા લોકોનો જમાવડો જોવા મળે છે.પરંતુ ભારે વરસાદ અને રિક્ષા સ્ટેન્ડ પર પાણીનો ભરાવો થઈ જતા રિક્ષા ચાલકોને મુશ્કેલી વેઠવાનો વારો આવ્યો છે.તેમજ પેસેન્જર અને રાહદારીઓને પણ માર્ગ પરથી પસાર થવું મુશ્કેલરૂપ બની ગયું છે.નગરપાલિકાની ગટર લાઈન ચોકઅપ થઈ જવાના કારણે પાણી માર્ગ પર ભરાય ગયું હોવાનું રિક્ષા ચાલકો જણાવી રહ્યા છે,તેમજ વહેલી તકે પાલિકા તંત્ર દ્વારા ગટર લાઈનની યોગ્ય સફાઈ કરવામાં આવે તેવી માંગ પણ તેઓએ કરી રહ્યા છે.