વોર્ડ નં. 1ના સરફરાઝ પાર્કમાં પ્રાથમિક સુવિધાનો અભાવ
સ્થાનિકો દ્વારા નગરપાલિકા કચેરી ખાતે રજૂઆત કરાય
પાલિકા સભ્યએ કેટલીક સુવિધાનો અભાવ હોવાનું જણાવ્યુ
અન્ય સુવિધાઓ માટે ચીફ ઓફિસરે સ્થાનિકોને ખાતરી આપી
આગામી દિવસોમાં સુવિધા ઉપલબ્ધ કરવાની ખાતરી અપાય
ભરૂચ શહેરના વોર્ડ નં. 1ના સરફરાઝ પાર્કમાં પાલિકાની સુવિધાનો અભાવ હોવાના આક્ષેપ સાથે સ્થાનિકોએ નગરપાલિકા ખાતે ચીફ ઓફિસરને રજૂઆત કરતા આગામી દિવસોમાં સુવિધા ઉપલબ્ધ કરવાની ખાતરી આપી હતી.
ભરૂચ શહેરના પશ્ચિમ વિસ્તારમાં વોર્ડ નં. 1માં આવેલ સરફરાઝ પાર્કમાં પાલિકા દ્વારા પ્રાથમિક જરૂરીયાત પુરી પાડવામાં આવતી ન હોવાના આક્ષેપ સાથે સ્થાનિકોએ પાલિકા ચીફ ઓફિસરને રજૂઆત કરી હતી. 25 વર્ષોથી પાલિકા દ્વારા વેરો વસૂલાત કરવામાં આવતો હોવા છતાં પણ પાલિકા ઓરમાયું વર્તન કરી સુવિધા આપતી ન હોવાનો સ્થાનિકોએ આક્ષેપ કર્યો હતો. આ બાબતે પાલિકા સભ્ય અને પૂર્વ વિપક્ષ નેતા સલીમ અમદાવાદીએ જણાવ્યુ હતું કે, લોકોની રજૂઆત મુજબ ગટર, લાઈટ વિગેરે સુવિધા ઊભી કરવામાં આવી છે. તેમ છતાં રોડ સહિત અન્ય સુવિધાઓનો હજુ અભાવ છે. જોકે, આગામી દિવસોમાં તમામ સુવિધાઓ પૂર્ણ કરવામાં આવશે તેવી પાલિકા ચીફ ઓફિસર દ્વારા ખાતરી આપવામાં આવી હોવાનું જાણવા મળ્યું છે.