ભરૂચ: વાગરાના વેંગણી ગામે 10 વર્ષથી પાણીનો પ્રશ્ન, કલેકટરને આવેદનપત્ર પાઠવી કરી રજુઆત

ભરૂચના  વાગરા તાલુકાના વેગણી ગામમાં 10 વર્ષથી પાણીની તંગી ત્રસ્ત ગ્રામજનોએ કલેકટરને આવેદનપત્ર પાઠવી રજુઆત કરી હતી

ભરૂચ વાગરા તાલુકાના વેગણી ગામે છેલ્લા દસ વર્ષથી પાણીની તંગી હજી પણ યથાવત છે. ગ્રામજનોએ અનેક વાર રજૂઆત છતાં સમસ્યાનું સમાધાન ન થતાં હવે ભરૂચ કલેક્ટરને આવેદનપત્ર પાઠવીને તાત્કાલિક પાણી વ્યવસ્થા કરવા માંગ ઊઠાવી છે. ગ્રામજનોએ કલેકટરને પાઠવેલ આવેદનપત્રમાં  જણાવ્યું હતું કે, પીએચસી સ્કીમ અને પાણી પુરવઠાની વિવિધ યોજનાઓ હોવા છતાં ગામમાં પીવાનું પાણી મળી રહ્યું નથી.

તંત્ર દ્વારા વારંવાર આશ્વાસનો આપવામાં આવ્યા છે, પરંતુ કાર્યવાહી શૂન્ય છે.હાલત તો એવી છે કે, થોડા દિવસ અગાઉ પાણીની તંગીથી પરેશાન થયેલા ગ્રામજનોએ જીઆઇડીસીથી પસાર થતી પાઇપલાઇનમાં છિદ્ર કરી પાણી લેવા પ્રયાસ કર્યો હતો પણ તેમને તંત્ર દ્વારા અટકાવવામાં આવ્યા હતા.આ અગાઉ પણ ગ્રામજનોએ આત્મવિલોપનની ચીમકી સાથે વિરોધ નોંધાવ્યો હતો તેમ છતાં કોઈ પરિણામ આવ્યું નથી ત્યારે પાણીના પ્રશ્નનો તાકીદે નિવેડો લાવવા ગ્રામજનો દ્વારા માંગ કરવામાં આવી છે અને જો માંગ ન સંતોષાય તો ઉગ્ર આંદોલનની ચીમકી ઉચ્ચારાય છે.