ગીર સોમનાથ : વેરાવળ કોર્ટને બોમ્બથી ઉડાવી દેવાની ધમકી મળતા ખળભળાટ, વાંધાજનક વસ્તુ ન મળી આવતા ભયનો માહોલ શાંત પડ્યો

• વેરાવળ કોર્ટને બોમ્બથી ઉડાવી દેવાની ધમકી મળતા ખળભળાટ

• બોમ્બ સ્ક્વોડ અને સુરક્ષા એજન્સીઓએ સર્ચ ઓપરેશન હાથ ધર્યું

• કોર્ટને RDX બોમ્બથી ઉડાવી દેવાની ઈમેલ દ્વારા મળી હતી ધમકી

• બોમ્બ હોવાની વાતે સમગ્ર કોર્ટ સંકુલ ખાલી કરાવી દેવામાં આવ્યું

• કોર્ટ સંકુલમાંથી કોઈપણ વાંધાજનક વસ્તુ મળી ન આવી : DYSP

ગીર સોમનાથ જિલ્લાની વેરાવળ કોર્ટને બોમ્બથી ઉડાવી દેવાની ધમકી મળતા બોમ્બ સ્ક્વોડ સહિતની સુરક્ષા એજન્સીઓ દ્વારા સર્ચ ઓપરેશન હાથ ધરવામાં આવ્યું હતું.

ગીર સોમનાથ જિલ્લાની વેરાવળ કોર્ટને RDX બોમ્બથી ઉડાવી દેવાની ઈમેલ દ્વારા ધમકી મળ્યા બાદ સમગ્ર કોર્ટ પરિસરમાં ખળભળાટ મચી ગયો હતો. આ મામલે ડિસ્ટ્રીક જજ વિક્રમસિંહ ગોહિલ દ્વારા તાત્કાલિક સુરક્ષા એજન્સીઓને જાણ કરવામાં આવી હતી, ત્યારે કોર્ટનું જૂનું બિલ્ડીંગ સહિત સમગ્ર સંકુલ ખાલી કરાવી દેવામાં આવ્યું હતું. આ સાથે જ વકીલો, અસીલો તેમજ અન્ય લોકોની સુરક્ષા અને સલામતી માટે તેઓને બહાર કાઢવામાં આવ્યા હતા. આ દરમ્યાન વેરાવળ કોર્ટ બહાર મુખ્ય માર્ગ પર વકીલો અને અસિલોનો જમાવડો જોવા મળ્યો હતો. ઘટનાના પગલે સૌકોઈમાં ઉચાટનો માહોલ સર્જાયો હતો.

તો બીજી તરફ, બોમ્બ સ્ક્વોડ અને ડોગ સ્ક્વોડ દ્વારા સર્ચ ઓપરેશન હાથ ધરવામાં આવ્યું હતું. એલસીબી, એસઓજી સહિતની સુરક્ષા એજન્સીઓ પણ તપાસ અર્થે ઘટના સ્થળે પહોંચી હતી. જોકે, એક કલાકની તપાસ બાદ વેરાવળ કોર્ટ સંકુલમાં બોમ્બ હોવાની વાત અફવા સાબિત થઈ હતી. સઘન ચેકિંગના અંતે કોર્ટ સંકુલમાંથી કોઈપણ વાંધાજનક વસ્તુ મળી આવી નથી. જેથી સંપૂર્ણ કોર્ટ સંકુલને ફરીથી કાર્યરત કરવા માટે ખુલ્લું મુકવામાં આવ્યું છે. આ ઘટનાથી વેરાવળમાં સર્જાયેલો ભયનો માહોલ અંતે શાંત પડ્યો હતો.