• જંગલ વિસ્તારમાં રહેતા સિંહો માનવ વસાહત તરફ વળ્યા

• પશુ અને માનવ પર સિંહાના હુમલાની ઘટનામાં પણ વધારો

• સોસાયટીમાં સિંહોએ ગાયનું મારણ કરતાં સ્થાનિકોમાં ભય

• સિંહો માનવ વસાહત તરફ ન આવે દિશામાં કામગીરી જરૂરી

• પંથકમાં સિંહોની અવરજવર વધતાં વન વિભાગ સતર્ક થયું

જંગલ વિસ્તારમાં રહેતા સિંહો હવે માનવ વસાહત તરફ આવવા લાગતા લોકોમાં પણ અચરજ સાથે ભયનો માહોલ ફેલાયો છે, ત્યારે માનવ વસાહત તરફ આવતા સિંહોની અવરજવર મુદ્દે વન વિભાગ દ્વારા પ્રતિક્રિયા આપવામાં આવી હતી.

ગીર પંથકમાં વન્યપ્રાણીનો આતંક હવે દિવસેને દિવસે વધી રહ્યો છે. કેટલાક રહેણાંક વિસ્તારો અને સીમ વિસ્તારમાં પશુ અને માનવ પર હુમલાની ઘટનામાં પણ સતત વધારો થઈ રહ્યો છે. તેવામાં તાજેતરમાં અમરેલી પંથકમાં પણ સિંહના હુમલામાં 2 લોકો ઘવાયા હતા. તો બીજી તરફ, જુનાગઢના મધુરમ વિસ્તારમાં આવેલી ચંદન પાર્ક સોસાયટીમાં 3 સિંહોએ આવી ગાયનું મારણ કરતો વિડિયો સોશ્યલ મીડિયામાં વાયરલ થતા સ્થાનિકોમાં ભય ફેલાયો હતો. જેમાં સિંહો માનવ વસાહત તરફ આવી ન ચડે તે દિશામાં કામગીરી કરાય તે અંગે વન વિભાગને રજૂઆત કરી હતી.

સમગ્ર મામલે જુનાગઢ વન વિભાગના અધિકારી કે. રમેશે જણાવ્યું હતું કે, હાલ જે વિડિયો સોશ્યલ મીડિયામાં વાયરલ થયો છે, તેમાં એક માદા સિંહણે ત્રણેક વર્ષ પહેલાં 3 બચ્ચાને જન્મ આપ્યો હતો. જે સિંહબાળ હવે મોટા થયા છે. જેમ જેમ માનવ વસ્તી વધે છે, તેમ સિંહોની વસ્તી પણ વધતી જાય છે, તેમજ રખડતાં પશુઓના કારણે પણ સિંહો માનવ વસાહત તરફ આવવા લાગ્યા છે, જ્યાં જ્યાં લાઈટો નથી, ત્યાં મહાનગરપાલિકા અને જિલ્લા પંચાયતને સ્ટ્રીટ લાઈટો મુકવા જણાવ્યું હતું. પરંતુ હજુ સુધી કોઈ માનવને સિંહે નુકશાન કર્યું નથી. આ મુદ્દે વન વિભાગ સતત કાર્યરત છે, જે સિંહો માનવ વસાહત તરફ ન આવે તેવા પ્રયાસો કરી રહ્યું છે.