• મેંદરડા તાલુકામાં આરોગ્ય સેવા ગંભીર રીતે ખોરવાય

• સામુહિક આરોગ્ય કેન્દ્રમાં ડોક્ટરની કાયમી જગ્યા ખાલી

• 47 ગામોના નાગરિકોને આવતો હાલાકી વેઠવાનો વારો

• અનેક દર્દીઓને આરોગ્ય સેવા સામે તકલીફોનો સામનો

• વહેલી તકે તબીબની નિમણૂંક કરવા સ્થાનિકોની રજૂઆત

જુનાગઢ જિલ્લાના મેંદરડા તાલુકામાં આરોગ્ય સેવા છેલ્લા ઘણાં સમયથી ગંભીર રીતે ખોરવાઈ રહી છે. ખાસ કરીને મેંદરડા તાલુકા મથકે આવેલ સામુહિક આરોગ્ય કેન્દ્રમાં લાંબા સમયથીMBBS ડોક્ટરની કાયમી જગ્યાઓ ખાલી પડેલી છે. આ ઘટનાથી ન માત્ર શહેરના લોકો, પણ આસપાસના 47 ગામોના નાગરિકોને પણ ગંભીર તકલીફોનો સામનો કરવો પડી રહ્યો છે.

જુનાગઢ જિલ્લાના મેંદરડા આરોગ્ય કેન્દ્રમાં છેલ્લા 7 મહિનાથી એક પણ કાયમીMBBS ડોક્ટર ફરજ પર નથી. હાલ બધાજ ડોક્ટરો ડેપ્યુટેશન અથવા અસ્થાયી ધોરણે કામ કરી રહ્યા છે. આ બદલતી સેવાઓના કારણે દર્દીઓને સતત અવ્યવસ્થાનો સામનો કરવો પડે છે, જ્યારે ગંભીર કે ઇમરજન્સી કેસમાં તેમને જૂનાગઢ શહેર સુધી દોડવું પડે છે. આ સમસ્યા અંગે હવે લોકોમાં અસંતોષ ઉગ્ર બની રહ્યો છે.

મેંદરડા તાલુકા પંચાયતના પૂર્વ પ્રમુખ રાજુ વિઠલાણી સહિત ગામના આગેવાનોએ સ્થાનિક રાજકીય પક્ષોના સહયોગથી મામલતદાર કચેરીએ આવેદન પત્ર પાઠવી તાત્કાલિક કાયમી ડોક્ટર નિમણૂક કરવાની માંગ કરી છે. તેઓએ જણાવ્યું કે, “અમે અગાઉ પણ આ મુદ્દે અનેક રજૂઆતો કરી છે, પણ તંત્ર તરફથી કોઈ પગલું લેવાતું નથી. હવે લોકોના ધીરજનો પાળો તૂટી રહ્યો છે.” મેંદરડા સાણંદ તરફથી ગીર સાસણ જવા માટેનું પ્રવેશદ્વાર છે. તહેવારો, વેકેશન અને લગ્ન સિઝનમાં અહીં હજારો પ્રવાસીઓ આવતા હોય છે.

વર્ષ 2023-24માંCHCમાં દરરોજ આશરે 300 દર્દીઓ સારવાર માટે આવતા હતા. પરંતુ હાલ કોઈ ક્વોલિફાઇડ ડોક્ટર ન હોવાના કારણે દર્દીઓની સંખ્યા ઘટી રહી છે, અને લોકો મજબૂરીમાં ખાનગી હોસ્પિટલ કે જૂનાગઢ તરફ દોડે છે, જ્યારે અન્ય નજીકના તાલુકાઓમાં 3થી વધુ કાયમીMBBS ડોક્ટરો ફરજ બજાવી રહ્યા છે, ત્યારે મેંદરડાCHCમાં એક પણ કાયમી ડોક્ટર નથી. લોકો ખુલ્લેઆમ સવાલ ઉઠાવી રહ્યા છે કે, “શું મેંદરડા તાલુકો તંત્ર માટે ઓરમાયો છે?” સ્થાનિકોએ ચિમકી આપી છે કે, જો તાત્કાલિક ડોક્ટરની કાયમી નિમણૂક નહીં થાય તો ગાંધીજીના માર્ગે ઉગ્ર આંદોલન કરવામાં આવશે.

મેંદરડાCHCમાં રોજબરોજ અકસ્માત કે, ઈમરજન્સી કેસો પણ આવતા હોય છે, ત્યારે કાયમી ડોક્ટર ન હોવાના કારણે ઘણીવાર સારવારમાં વિલંબ થાય છે, જે દર્દી માટે જીવલેણ બની શકે છે. તાલુકા મથક પર આરોગ્ય સેવાની આ સ્થિતિે તંત્રના આરોગ્ય વિભાગ સામે અનેક સવાલો ઉભા કર્યા છે.