છોટાઉદેપુર : પાવી-જેતપુરના ભારજ નદી પુલનો એક ભાગ તણાયો, ગ્રામજનોને ભારે હાલાકી

છોટાઉદેપુર જિલ્લાના પાવી જેતપુર પાસે ભારજ નદી ઉપર પુલનો એક ભાગ તણાયો હતો. ભારજ નદીનું ડાયવર્ઝન સંપૂર્ણ પાણીમાં ધોવાઈ જતાં અનેક લોકો અટવાયા હતા.

છોટાઉદેપુર જિલ્લામાં પાવી-જેતપુર પાસે આવેલ ભારજ નદી પરનો બ્રિજ એક વર્ષ પહેલાં જ ક્ષતિગ્રસ્ત થયો હતો. જેને લઈને ડાયવર્ઝન બનાવવામાં આવ્યું હતું. જેની કામગીરીમાં 2 કરોડથી વધુનો ખર્ચ કરવામાં આવ્યો હતો, જ્યારે પુલ બનાવવાં માટે તંત્રએ એક વર્ષથી કોઈ કામગીરી ન કરી હતી. આ તરફ, સુખી ડેમમાંથી પાણી છોડાતા ડાયવર્ઝન તો ધોવાયુ છે, સાથે સાથે પુલનો એક ભાગ પણ તૂટી જતા બ્રિજ 2 ભાગમાં વેંચાય ગયો છે. આ સાથે રેલવે સેવા એક મુખ્ય આધાર છે, જ્યારે હાલ તો છોટાઉદેપુર જિલ્લાનું વડું મથક છે, ત્યાં જવા માટે લોકોને 30 કિલોમીટરનો ફેરો લગાવવાનો વારો આવ્યો છે. સ્થાનિકોએ આક્ષેપ કર્યો છે કે, રાજ્ય અને કેન્દ્ર સરકાર અને તંત્ર દ્વારા એક વર્ષથી પુલની કામગીરી કરવામાં આવી નથી, ત્યારે છોટાઉદેપુર જિલ્લાની પ્રજા અને પાવી જેતપુર તાલુકાના ખેડૂતો સૌથી વધુ મુશ્કેલીમાં મુકાયા છે, ત્યારે હવે વહેલી તકે વૈકલ્પિક વ્યવસ્થા કરવામાં આવે, અને પુલની મંજૂરી આપવામાં આવે તેવી સ્થાનિકો માંગ કરી રહ્યા છે.