સુરેન્દ્રનગર : ધ્રાંગધ્રાના ચુલી નજીક અકસ્માતમાં 3 લોકોના ઘટના સ્થળે મોત, 2 લોકો ઘાયલ...

સુરેન્દ્રનગર જિલ્લાના ધ્રાંગધ્રા તાલુકાના ચુલી ગામ નજીક અજાણ્યા વાહનની ટક્કરે રિક્ષા ફંગોળાય હતી, ત્યારે આ અકસ્માતની ગોઝારી ઘટનામાં 3 લોકોના ઘટના સ્થળે મોત નીપજ્યાં હતા, જ્યારે 2 લોકોને ગંભીર ઇજાના પગલે સારવાર અર્થે હોસ્પિટલ ખસેડવામાં આવ્યા હતા. મળતી માહિતી અનુસાર, ગત મોડી રાત્રે ધ્રાંગધ્રા-કચ્છ હાઇવે પર ધ્રાંગધ્રા તાલુકાના ચુલી ગામ નજીકથી પસાર થતી રિક્ષાને કચ્છ તરફ જતા અજાણ્યા વાહને ટક્કર મારતા ગમખ્વાર અકસ્માત સર્જાયો હતો, ત્યારે રિક્ષામાં સવાર હિતેશ સાબરીયા, નંદુ પરમાર અને પુષ્પા વાણિયાનું ઘટના સ્થળે જ મોત નીપજ્યું હતું, જ્યારે અન્ય બે મહિલાઓને ગંભીર ઇજાના પગલે સારવાર અર્થે ધ્રાંગધ્રા સરકારી હોસ્પિટલ ખસેડવામાં આવી હતી. બનાવની જાણ થતા જ ધ્રાંગધ્રા તાલુકા પોલીસ કાફલો તાત્કાલિક ઘટના સ્થળે અને ત્યારબાદ હોસ્પિટલ દોડી આવી વધુ તપાસ હાથ ધરી હતી. અકસ્માતમાં મૃત્યુ પામનાર તેમજ ઇજાગ્રસ્ત લોકો ધ્રાંગધ્રા તાલુકાના જીવા ગામના વતની હોવાનું જાણવા મળ્યું છે.