સુરેન્દ્રનગર : ચાલુ બાઈક પર અનોખા સ્ટંટ કરતાં સલી ગામના 63 વર્ષીય વૃદ્ધ કાકા, જુઓ વિડીયો...

સુરેન્દ્રનગર જિલ્લાના પાટડી તાલુકાના સલી ગામના એક વૃદ્ધ કાકાનો બાઇક પર અનોખા સ્ટંટ કરતો વિડીયો હાલ સોશિયલ મિડીયામાં ખૂબ ધૂમ મચાવી રહ્યો છે. જોકે, આ વિડીયો અત્યાર સુધીમાં લોકો દ્વારા 10 લાખથી વધુ વખત જોવાય ચૂક્યો છે.

હાલના સમયમાં સોશિયલ મીડિયામાં દરરોજ ઘણા બધા વિડીયો વાયરલ થઈ રહ્યા છે. પણ તાજેતરમાં વાયરલ થયેલા એક વિડીયોમાં વૃદ્ધ કાકા ચાલું બાઈક પર સ્ટંટ કરતાં જોવા મળે છે. મૂળ સુરેન્દ્રનગર જિલ્લાના દસાડા તાલુકાના સલી ગામના રહેવાસી 63 વર્ષીય મૂળજી નાડોદા ખેડૂત છે. 3 વર્ષ પહેલા તેઓએ બાઈક સ્ટંટ કરવાનું શરૂ કર્યું કર્યું. સરપંચની ચૂંટણી સમયે જ્યારે તેઓ સલી ગામથી પાટડી તરફ જઈ રહ્યા હતા, તે સમયે પહેલી વખત તેઓએ બાઈક પર સ્ટંટ કર્યા હતા. એ દિવસથી અત્યાર સુધી જ્યારે પણ તેઓ બાઈક લઈને નીકળે છે, ત્યારે બાઈક પર સ્ટંટ કરતા જોવા મળે છે. મૂળજી નાડોદા ચાલું બાઈકે હાથ ઊંચા કરીને કુદકા મારે છે અને બાઈકની પાછળની સીટ પર સૂઈ જાય છે.

રસ્તામાં સ્પીડ બ્રેકર આવે કે, ખાડો તો પણ તેઓ બાઈક સરળતાથી હંકારી શકે છે. ઉપરાંત સામેથી કોઈ વાહન આવે તો પણ તે સહેલાઇથી બાઈક ચલાવી શકે છે. તેઓ જે બાજુ હાથનો ઈશારો કરે તે બાજુ બાઈક ટર્ન થાય છે. એક દિવસ જ્યારે તેઓ બાઈક પર સ્ટંટ કરી રહ્યા હતા, ત્યારે કોઈ રાહદારીએ મોબાઈલમાં વીડિયો રેકોર્ડ કરી લીધો હતો. આ વીડિયો સોશિયલ મીડિયા પર જોરશોરથી વાયરલ થઈ રહ્યો છે. કોઈએ ઈન્સ્ટાગ્રામ પર રીલ્સ બનાવી છે, તો કોઈએ યુટ્યુબ પર શેર કર્યો છે. બીજા પણ ઘણા સોશિયલ મીડિયા પર આ વીડિયો લાખો વખત જોવાય ચૂક્યો છે.