• સાવરકુંડલામાં હીરા કારખાનેદારના અપહરણની ઘટના

• ધોળે દિવસે સ્વિફ્ટ કારમાં આવેલા શખ્સોએ કર્યું અપહરણ

• પોલીસે ગણતરીના સમયમાં જ 4 આરોપીઓની કરી ધરપકડ

• પોલીસે અપહરણકર્તાની કેદમાંથી યુવકને કરાવ્યો મુક્ત

• આર્થિક લેતી દેતીમાં અપહરણ કરવામાં આવ્યું હોવાનું અનુમાન 

અમરેલી જિલ્લાના સાવરકુંડલા ખાતે ધોળા દિવસે એક હીરાનું કારખાનું ધરાવતા યુવકનું સ્વિફ્ટ કારમાં આવેલા 3 યુવકો દ્વારા અપહરણ કરવામાં આવ્યું હતું. જે અપહરણની ઘટના CCTVમાં કેદ થઈ હતી.જોકે પોલીસે ગણતરીના કલાકોમાં 4 આરોપીઓને ઝડપી પાડયા હતા.

અમરેલી જિલ્લાના સાવરકુંડલાના શિવાજીનગરમાં પટેલ વાડી પાસે ધોળા દિવસે સ્વિફ્ટ કારમાં આવેલા અપહરણકારો ભરત પાઘડાળનું અપહરણ કરીને ફરાર થઇ ગયા હતા.સુરતના બારડોલી ખાતે આ ભરત પાઘડાળ હીરાનું કારખાનું ધરાવતો હતો,જોકે કારખાનામાં ખોટ જતાં સાવરકુંડલા આવ્યો હતો.અને પૈસાની લેતી દેતીમાં અપહરણ થયું હોવાનું પોલીસ ફરિયાદમાં નોંધવામાં આવ્યું હતું,

ઘટનામાં અમરેલી LCB, SOG અને સાવરકુંડલા સીટી પોલીસ દ્વારા હ્યુમન સોર્સ અને ટેકનિકલ સોર્સ દ્વારા અપહરણકર્તા 4 આરોપીઓને ગણતરીના કલાકોમાં જ ગોંડલ નજીકથી ઝડપી લેવામાં પોલીસ તંત્ર સફળ થયું હતું.

અપહરણકર્તા રાજકોટ જિલ્લાના નાના ઈંટોળાના તેજપાલસિંહ ગુલાબસિંહ જાડેજા, રાજકોટના મેટોડા ગામના ભાગ્યપાલસિંહ મહેન્દ્રસિંહ જાડેજા, જૂનાગઢના કેશોદના કિશોર નારણ પંપાણીયા અને પિયુષ રામજી સાવલિયાની હીરાનું કારખાનું ધરાવતા ભરત પાઘડાળને અપહરણ કરતાની ચુંગાલમાંથી મુક્ત કરાવ્યો હતો.આરોપીઓને સાવરકુંડલા સીટી પોલીસ મથકમાં સોંપવામાં આવ્યા હતા.અને વધુ તપાસ શરૂ કરવામાં આવી છે.