ગુજરાતના 11 જિલ્લામાં ભારે પવન સાથે વરસાદની ચેતવણી,પવન સાથે વાવાઝોડું ફૂંકાવવાની પણ શક્યતા

ગુજરાત રાજ્યના ઘણા શહેરોમાં કમોસમી વરસાદથી લોકોને રાહત મળી છે. હવામાન વિભાગે આગાહી કરી છે કે 13 મે 2025ના રોજ ઘણા જિલ્લાઓમાં વરસાદ પડી શકે છે.આજે અમરેલી, જૂનાગઢ, ગીર, સોમનાથ, દીવ, રાજકોટ, ભાવનગરમાં ગાજવીજ અને ભારે પવન સાથે ભારેથી મધ્યમ વરસાદની આગાહી છે. પોરબંદર, બોટાદ, ડાંગ, સાબરકાંઠામાં ગાજવીજ સાથે મધ્યમ વરસાદની આગાહી છે.

છેલ્લા 10 દિવસથી રાજ્યના હવામાનમાં ફેરફાર થયો છે. મોટાભાગના વિસ્તારોમાં ભારે પવન અને વાવાઝોડા સાથે ભારે વરસાદ પડ્યો હતો. ત્યારે હવામાન નિષ્ણાત અંબાલાલ પટેલે જણાવ્યું હતું કે આજથી 15 તારીખ સુધી રાજ્યના ઘણા ભાગોમાં વરસાદ પડશે. આ સમયગાળા દરમિયાન પ્રી-મોન્સૂનની અસર જોવા મળશે.

આજથી 15મી તારીખ સુધી કચ્છ, ઉત્તર અને મધ્ય ગુજરાતના કેટલાક ભાગોમાં વાવાઝોડું અને વીજળી સાથે વરસાદની શક્યતા છે. આ પછી, 19 થી 22 તારીખ સુધી તોફાન અને પવન સાથે વરસાદ પડી શકે છે. અરબી સમુદ્રમાં દબાણને કારણે, 24 મે થી 4 જૂન દરમિયાન રાજ્યના દરિયાકાંઠાના વિસ્તારોમાં વરસાદ પડી શકે છે.

હવામાન વિભાગે દ્વારકા, જામનગર, મોરબી, સુરેન્દ્રનગર, અમદાવાદ, ગાંધીનગર, મહેસાણા, સુરત, છોટા ઉદેપુર, નર્મદા, તાપી, નવસારી, વલસાડ, દાદરાનગર હવેલી, દમણ, દાહોદ, મહિસાગર, કચ્છમાં વરસાદ અને વાવાઝોડાની આગાહી કરી છે.

હવામાન વિભાગે આગામી ત્રણ કલાક માટે આગાહી કરી છે. જેમાં 40 કિમી પ્રતિ કલાકની ઝડપે પવન ફૂંકાવાની સાથે હળવું વાવાઝોડું રહેશે. આણંદ, ભાવનગર અને ખેડા જિલ્લાઓમાં છૂટાછવાયા સ્થળોએ વરસાદની સંભાવના છે. વાદળછાયું વાતાવરણ સાથે વીજળી પડવાની પણ સંભાવના રહેશે.