શિયાળાની ઋતુમાં વજન વધવા લાગે છે, તેથી આ આદતોને તમારી દિનચર્યામાં સામેલ કરો...

શિયાળાની ઋતુમાં વજન વધવું એ સામાન્ય બાબત બની ગઈ છે. આ દિવસોમાં રજાઇ અને ધાબળા ઓઢીને ઘરમાં જ બેસી રહેવાનુ મન થાય છે, અને તેમાય આ ઠંડી ઋતુમાં સ્વાદિસ્ટ અને હેલ્ધી વાનગીઓ ખાવાનું વધારે મન થાય છે, પરંતુ શું તમે જાણો છો કે તમારી આ આદત તમારું સ્વાસ્થ્ય બગાડી શકે છે. ઘર હોય કે ઓફિસ, બેસીને ખાવા-પીવાની ટેવને કારણે વજન વધવું સ્વાભાવિક છે. શિયાળામાં લોકો ઠંડીના કારણે કસરત અને યોગ કરવાનું ટાળતા હોય છે, જેના કારણે પેટ દેખાવા લાગે છે. આ ઋતુમાં આપણું ચયાપચય ખૂબ જ ધીમું થઈ જાય છે, અને પેટ ફૂલવું, ગેસ વગેરે જેવી સમસ્યા થાય છે, જેના કારણે ખોરાક મોડા પચે છે અને ચરબીમાં પરિવર્તિત થઈ જાય છે. આવી સ્થિતિમાં આટલી વસ્તુથી દૂર રહેવું જોઈએ જેથી તમે શિયાળામાં તમારું વજન પણ નિયંત્રણમાં રાખી શકો છો.

ચા અને કોફીથી દૂર રહેવું :-

ઘણા લોકો ચા અને કોફીના શોખીન હોય છે. ખાસ કરીને શિયાળામાં લોકો વધુ મસાલાવાળી ચા પીવાની આદત બનાવી લે છે, જે વજન વધવાનું એક મોટું કારણ છે. તેના વધુ પડતા સેવનથી શરીરમાં પાણીની ઉણપ થાય છે, જેના પછી વજન ઓછું કરવું મુશ્કેલ બની જાય છે. પાણીની આ ઉણપ તમારા સ્વાસ્થ્ય પર ખરાબ અસર કરી શકે છે.

પૂરતી ઊંઘ લો :-

પર્યાપ્ત માત્રામાં ઊંઘ તમારા વજનને નિયંત્રિત કરવામાં પણ મદદ કરે છે. 7 થી 8 કલાકની ઊંઘ સારી માનવામાં આવે છે. તમારા પાચનને નિયંત્રિત કરવાની સાથે, તે તણાવ ઘટાડવામાં પણ મદદ કરે છે.

મીઠાઈઓથી દૂર રહો :-

શિયાળામાં વિવિધ પ્રકારની તલ અને ગોળની વાનગી ,ગરમાગરમ ગુલાબ જાંબુ અને ગાજરનો હલવો બધાને ગમે છે. આ ઋતુમાં ગોળની પટ્ટી, તલના ગજક જેવી વસ્તુઓ સ્વાદમાં સ્વાદિષ્ટ હોય છે, પરંતુ વજન વધારવામાં મોટો ભાગ ભજવે છે. આવી સ્થિતિમાં, ધ્યાનમાં રાખો કે તમે આ વસ્તુઓ કેટલી માત્રામાં ખાઓ છો.

પ્રોસેસ્ડ ફૂડ ટાળો :-

તમારું વજન વધારવા માટે પ્રોસેસ્ડ ફૂડ પણ જવાબદાર છે. તેમાં ખાંડ, ચરબી અને કેલરી વધુ હોય છે, જે શરીરમાં કોલેસ્ટ્રોલ વધારે છે. આ ઉપરાંત, આ ખોરાક હૃદય અને ડાયાબિટીસના દર્દીઓ માટે પણ ખરાબ છે. તેથી, તે વધુ સારું છે કે તમે તેને તમારા આહારમાંથી તરત જ દૂર કરો.