મણિપુરમાં શસ્ત્રો સમર્પણ : 5 જિલ્લામાંથી વધુ 33 શસ્ત્રો સમર્પણ, 6 માર્ચ છેલ્લી તારીખ

મંગળવારે, ચુરાચંદપુર, થૌબલ, ઇમ્ફાલ પૂર્વ, ઇમ્ફાલ પશ્ચિમ અને વિષ્ણુપુર જિલ્લાઓમાં લોકોએ સ્વેચ્છાએ કુલ 33 પ્રકારના હથિયારો, દારૂગોળો અને અન્ય સામગ્રી જમા કરી હતી.

મણિપુરમાં રાષ્ટ્રપતિ શાસન લાગુ થયા બાદથી શસ્ત્રો સમર્પણ ચાલુ છે. મણિપુરના રાજ્યપાલ અજય કુમાર ભલ્લાએ શુક્રવારે શસ્ત્રો સમર્પણની તારીખ 6 માર્ચ સુધી લંબાવી હતી. પહાડી અને ખીણ બંને વિસ્તારના લોકોએ વધારાના સમયની માંગણી કર્યા બાદ આ કરવામાં આવ્યું છે, ત્યારબાદ હથિયારો સતત સરેન્ડર કરવામાં આવી રહ્યા છે. પોલીસે જણાવ્યું કે 87 પ્રકારના હથિયારો, દારૂગોળો અને વિવિધ વસ્તુઓ સ્વેચ્છાએ સમર્પણ કરવામાં આવી હતી.

પોલીસે આજે જણાવ્યું હતું કે કુલ 33 પ્રકારના શસ્ત્રો, દારૂગોળો અને અન્ય સામગ્રી લોકો દ્વારા ચુરાચંદપુર, થૌબલ, ઇમ્ફાલ પૂર્વ, ઇમ્ફાલ પશ્ચિમ અને વિષ્ણુપુર જિલ્લામાં સ્વેચ્છાએ જમા કરવામાં આવી હતી.

હથિયાર સમર્પણની તારીખ હજુ દૂર છે. આવી સ્થિતિમાં આગામી સમયમાં વધુ હથિયારો એકઠા થઈ શકે છે. 20 ફેબ્રુઆરીના રોજ રાજ્યપાલ અજય કુમાર ભલ્લાએ હિંસામાં સામેલ જૂથોને આત્મસમર્પણ કરવા અને સુરક્ષા દળો પાસેથી લૂંટેલા શસ્ત્રો અને અન્ય ગેરકાયદેસર રીતે રાખેલા શસ્ત્રો સાત દિવસની અંદર પરત કરવા વિનંતી કરી હતી.

મે 2023 થી, મેઇતેઇ અને કુકી-ઝો જૂથો વચ્ચેની વંશીય હિંસામાં 250 થી વધુ લોકોના મોત થયા છે. આ હિંસાને કારણે હજારો લોકો બેઘર બન્યા છે. રાજ્યના મુખ્યમંત્રી એન બિરેન સિંહના રાજીનામા બાદ અહીં 13 ફેબ્રુઆરીથી રાષ્ટ્રપતિ શાસન લાગુ કરવામાં આવ્યું હતું. હાલમાં અહીં રાજ્ય વિધાનસભાનો કાર્યકાળ 2027 સુધીનો છે. જે હાલ માટે સ્થગિત છે.

મણિપુરમાં 21 મહિના પછી સ્થિતિ સામાન્ય થવાની સંભાવના છે. ગૃહમંત્રી અમિત શાહે શનિવારે રાજ્યની સ્થિતિ અંગે સમીક્ષા બેઠક યોજી હતી. આ દરમિયાન તેમણે રસ્તા રોકનારાઓ સામે કડક કાર્યવાહી કરવાની સૂચના આપી છે. ગૃહમંત્રીએ 8 માર્ચથી મણિપુરના તમામ રસ્તાઓ પર અવિરત અવરજવર સુનિશ્ચિત કરવા જણાવ્યું છે.