સિધ્ધુની મુસીબતમાં વધારો, કેન્સરની સારવારના નિવેદન અંગે કાનૂની નોટિસ

પૂર્વ ક્રિકેટર અને પંજાબ કોંગ્રેસના નેતા નવજોતસિંહ સિદ્ધુ અને તેમની પત્ની નવજોત કૌર સિદ્ધુ એક નવા વિવાદમાં ફસાયા છે. છત્તીસગઢ સિવિલ સોસાયટીએ લીમડા-હળદરથી પત્નીના કેન્સરની સારવાર કરવાના નિવેદનને કારણે ચર્ચામાં આવેલા નવજોતસિંહ સિદ્ધુને કાનૂની નોટિસ ફટકારી છે. 

છત્તીસગઢ સિવિલ સોસાયટીએ પંજાબ કોંગ્રેસના પૂર્વ અધ્યક્ષ નવજોતસિંહ સિદ્ધુને 850 કરોડ રૂપિયાની કાનૂની નોટિસ મોકલી છે. નોટિસમાં સિદ્ધુને તેમની પત્ની નવજોત કૌરના કેન્સરની સારવારના દસ્તાવેજો 7 દિવસમાં જમા કરાવવા માટે કહેવામાં આવ્યું છે. આમ ન કરવા પર 850 કરોડ રૂપિયાની માંગણી કરવામાં આવી છે.

થોડા દિવસો પહેલા નવજોત સિદ્ધુએ કેન્સરને લઈને અમૃતસર સ્થિત પોતાના ઘરે પ્રેસ કોન્ફરન્સ કરી હતી, જેમાં તેમણે કેન્સર માટેના ડાયટ પ્લાન વિશે વાત કરી હતી અને કહ્યું હતું કે તેમની પત્નીને સ્ટેજ 4 કેન્સર હતું. ડોક્ટરોએ પણ જવાબ આપી દીધો હતો. એવા સમયે તેણે તેની જીવનશૈલી અને આહારમાં ફેરફાર કરીને આ રોગ પર કાબુ મેળવ્યો હતો. સિદ્ધુએ કહ્યું કે 40 દિવસમાં પોતાના આહારમાં ફેરફાર કરીને તેણે આ કેન્સરની બીમારી પર કાબુ મેળવ્યો છે.

આ પ્રેસ કોન્ફરન્સ બાદ લોકોએ એલોપેથિક દવાનો વિરોધ કર્યો હતો. હવે સિવિલ સોસાયટીએ નવજોત કૌર સિદ્ધુને એક પત્ર લખી ખુલાસો માંગ્યો છે કે શું તમે પણ તમારા પતિ દ્વારા કેન્સર વિશે કરેલા દાવાને સમર્થન આપો છો કે, તમે જે એલોપેથી દવા લીધી છે તેનાથી તમને કોઈ ફાયદો થયો નથી. તમારા આહારમાં લીમડાના પાન, લીંબુ પાણી, તુલસીના પાન, હળદરનો ઉપયોગને કારણે તમારો કેન્સરનો રોગ મટ્યો છે.

છત્તીસગઢ સિવિલ સોસાયટીના સંયોજક ડો.કુલદીપ સોલંકીએ કહ્યું હતું કે જો તમે પતિના દાવાને સમર્થન આપો છો તો 7 દિવસમાં પ્રમાણિત દસ્તાવેજો પ્રદાન કરો જેથી સ્પષ્ટ થઈ શકે કે તમે લીમડાના પાન, લીંબુ પાણી, તુલસીના પાન, હળદરનો ઉપયોગથી સ્ટેજ 4ના કેન્સરને માત આપી છે.અને આ સાબિત કરવામાં અસમર્થ થશે તો 850 કરોડ રૂપિયાની દાવો કરવાની ચીમકી ઉચ્ચારવામાં આવી છે.