ઓમર અબ્દુલ્લાએ પીએમની પ્રશંસા કરી, કહ્યું- મોદીએ એ કર્યું જે અંગ્રેજો ન કરી શક્યા

જમ્મુ અને કાશ્મીરના મુખ્યમંત્રી ઓમર અબ્દુલ્લાએ ચિનાબ બ્રિજના ઉદ્ઘાટન પ્રસંગે પ્રધાનમંત્રી નરેન્દ્ર મોદીની પ્રશંસા કરી. તેમણે કહ્યું કે આપણા પ્રધાનમંત્રીએ એ કર્યું જે અંગ્રેજો પણ ન કરી શક્યા. ચિનાબ બ્રિજ પ્રોજેક્ટ પૂર્ણ થતો જોવાનું દરેકનું સ્વપ્ન હતું, જે પીએમ મોદીએ આજે પૂર્ણ કર્યું છે.

પ્રધાનમંત્રી મોદીએ શુક્રવારે જમ્મુ અને કાશ્મીરના રિયાસી જિલ્લામાં ચિનાબ નદી પર બનેલા વિશ્વના સૌથી ઊંચા રેલ પુલનું ઉદ્ઘાટન ત્રિરંગો લહેરાવીને કર્યું. આ પછી, પીએમએ અંજી બ્રિજ અને કટર પર કાશ્મીરની પહેલી ટ્રેન વંદે ભારતને પણ લીલી ઝંડી બતાવી હતી

મુખ્યમંત્રી ઓમર અબ્દુલ્લાએ પ્રશંસા કરતા કહ્યું કે પીએમ મોદીએ એ કામ પૂર્ણ કર્યું જે અંગ્રેજો ન કરી શક્યા. તેમણે કહ્યું કે જ્યારે આ પ્રોજેક્ટ શરૂ થયો ત્યારે હું 8મા ધોરણમાં હતો. હવે હું 55 વર્ષનો છું. જમ્મુ અને કાશ્મીરને આ પ્રોજેક્ટથી ઘણો ફાયદો થશે. આવનારા દિવસોમાં સ્થાનિક લોકોને ઘણો ફાયદો થવાનો છે. ચિનાબ બ્રિજ રાજ્યના વિકાસને વેગ આપશે. ઓમરે વધુમાં કહ્યું કે આ સ્વપ્ન ઘણા દાયકાઓથી જોવામાં આવતું હતું. અંગ્રેજોએ પણ આનું સ્વપ્ન જોયું હતું. પરંતુ, જે અંગ્રેજો દ્વારા પૂર્ણ ન થઈ શક્યું તે વડા પ્રધાન નરેન્દ્ર મોદીના કાર્યકાળ દરમિયાન પૂર્ણ થયું.

આ પ્રોજેક્ટ રાજ્યના વિકાસને વેગ આપશે. આનાથી રાજ્યના ખેડૂતોને, ખાસ કરીને સફરજનનો વેપાર કરતા ખેડૂતોને ઘણો ફાયદો થશે. હવે કાશ્મીરમાં ઉગાડવામાં આવતા સફરજન દેશના વિવિધ ભાગોમાં સરળતાથી પહોંચી શકશે, જેનાથી દેશની આર્થિક સ્થિતિમાં પણ સુધારો થશે. તેમણે કહ્યું કે આનાથી માત્ર આવક વધશે નહીં પરંતુ યુવાનોને રોજગાર પણ મળશે.

પીએમે કહ્યું કે મને ચિનાબ બ્રિજ અને અંજી બ્રિજનું ઉદ્ઘાટન કરવાની તક મળી, તે મારા માટે સૌભાગ્યની વાત છે. જમ્મુ અને કાશ્મીરને બે નવી ટ્રેન મળી. જમ્મુ અને કાશ્મીરના લોકોને સંબોધતા તેમણે કહ્યું કે હું આ વિકાસ માટે આપ સૌને અભિનંદન આપું છું. રેલ કનેક્ટિવિટીનું સ્વપ્ન જોતા અહીં ઘણી પેઢીઓ પસાર થઈ છે. સીએમ ઓમરના શબ્દોનો ઉલ્લેખ કરતા તેમણે કહ્યું કે ઓમર કહે છે કે તેઓ સાતમા-આઠમા ધોરણમાં અભ્યાસ કરતા હતા ત્યારથી તેઓ આ પ્રોજેક્ટ પૂર્ણ થવાની રાહ જોઈ રહ્યા હતા. વધુમાં, તેમણે કહ્યું કે આજે લાખો લોકોનું સ્વપ્ન પૂર્ણ થયું છે.

જમ્મુ અને કાશ્મીરના મુખ્યમંત્રી ઓમર અબ્દુલ્લાએ શુક્રવારે એક જાહેર કાર્યક્રમમાં પ્રધાનમંત્રી નરેન્દ્ર મોદી પાસેથી રાજ્યને પૂર્ણ રાજ્યનો દરજ્જો પુનઃસ્થાપિત કરવાની માંગ કરી હતી. તેમણે કહ્યું કે આ મંચ પર ચાર લોકો છે જે 2014 માં કટરા રેલ્વે સ્ટેશનના ઉદ્ઘાટન સમયે હાજર હતા. તમે (વડાપ્રધાન મોદી) તે સમયે પહેલીવાર પ્રધાનમંત્રી બન્યા હતા. મનોજ સિંહા રેલ્વે રાજ્યમંત્રી હતા, અને હું રાજ્યનો મુખ્યમંત્રી હતો.

તેમણે વધુમાં કહ્યું કે, આજે મનોજ સિંહાજી ઉપરાજ્યપાલ છે, એટલે કે તેમને પ્રમોશન મળ્યું છે પરંતુ હું હવે રાજ્યનો નહીં, પણ એક કેન્દ્રશાસિત પ્રદેશનો મુખ્યમંત્રી બન્યો છું, એટલે કે મને ડિમોશન મળ્યું છે. મને વિશ્વાસ છે કે આ પરિસ્થિતિ ટૂંક સમયમાં બદલાશે અને તમારા કાર્યકાળ દરમિયાન જમ્મુ અને કાશ્મીરને ફરીથી રાજ્યનો દરજ્જો મળશે.