રાજ્યના મુખ્યમંત્રી ભુપેન્દ્ર પટેલની ઉપસ્થિતિમાં આજે સિંહ દિવસની ઉત્સાહભેર ઉજવણી કરવામાં આવી છે.
સમગ્ર દેશમાં એકમાત્ર ગુજરાતમાં વસવાટ કરતા એશિયાઈ સિંહો રાજ્યના ગૌરવ સમાન છે. આ ઉપરાંત એક પેડ માં કે નામ કાર્યક્રમ તેમજ ‘ગીરની સાંસ્કૃતિક ધરોહર‘ ફોટો એક્ઝિબિશનને પણ ખુલ્લુ મૂકવામાં આવ્યું હતું.
ગીરના સાસણ સિંહ સદન ખાતે સિંહ દિવસ નિમિત્તે મુખ્યમંત્રી ભુપેન્દ્ર પટેલની ઉપસ્થિતિમાં અલગ અલગ કાર્યક્રમોનું આયોજન કરવામાં આવ્યું હતું. જેમાં‘એક પેડ મા કે નામ’ અભિયાન અંતર્ગત ભાલછેલ ખાતે વિકસિત કરવામાં આવેલા સનસેટ પોઇન્ટ ખાતે વૃક્ષારોપણ કરવામાં આવ્યું હતું. તેમજ મુખ્યમંત્રી ભુપેન્દ્ર પટેલના હસ્તે સાસણ સિંહ સદન ખાતે ‘ગીરની સાંસ્કૃતિક ધરોહર‘ ફોટો એક્ઝિબિશનને પણ ખુલ્લુ મૂકવામાં આવ્યું હતું. આ ઉપરાંત મુખ્યમંત્રીએ જન જાગૃતિ રેલીને લીલી ઝંડી આપી પ્રસ્થાન કરાવ્યું હતું. જે રેલીમાં સિંહના માસ્ક પહેરીને મોટી સંખ્યામાં યુવાનો જોડાયા હતા.
આ પ્રસંગે પર્યાવરણ મંત્રી મુળુભાઈ બેરાએ જણાવ્યું હતું કે, દેશ અને રાજ્યનું ગૌરવ એવા સિંહોના સંરક્ષણ માટે વડાપ્રધાન નરેન્દ્ર મોદી દ્વારા પ્રોજેક્ટ લાયન 2047 ને ગયા વર્ષે જાહેરાત કરવામાં આવી હતી. સાસણ નજીકના વિસ્તારમાં ડિજિટલ ટેકનોલોજીનો ઉપયોગ કરવામાં આવ્યો છે, જેમાં અલગ અલગ વિસ્તારોમાં કેમેરા લગાવવામાં આવ્યા છે. જેનાથી સાસણગીરમાં આવતા વાહનોની ગતિ કેટલી છે તે જોઈ શકાશે અને તેનું મોનેટરીંગ પણ કરવામાં આવશે.
આ કાર્યક્રમમાં મુખ્યમંત્રી ભુપેન્દ્રભાઈ પટેલ, વનમંત્રી મુળુભાઈ બેરા, સાંસદ રાજેશ ચુડાસમા, ધારાસભ્ય દેવાભાઈ માલમ, ભગવાનજીભાઈ કરગટીયા, અરવિંદ લાડાણી, જિલ્લા પંચાયત પ્રમુખ હરેશભાઈ ઠુંમર સહિતના પદાધિકારીઓ અને વન વિભાગના ઉચ્ચ અધિકારીઓ ઉપસ્થિત રહ્યા હતા.
