ATMમાંથી રૂપિયા ઉપાડવા મોંઘા પડશે, જાણો 1 મેથી તમામ ટ્રાન્ઝેક્શન પર કેટલો ચાર્જ લાગશે?

જણાવી દઈએ કે રિઝર્વ બેંક ઓફ ઇન્ડિયા (RBI) એ તાજેતરમાં ATM ઇન્ટરચેન્જ ફીમાં વધારાને મંજૂરી આપી દીધી છે અને આ વધેલો ચાર્જ 1 મે, 2025 થી લાગુ થવા જઈ રહ્યો છે.

દર મહિનાની પહેલી તારીખે, દેશમાં ઘણા નિયમો બદલાય છે અને આગામી મહિનાની પહેલી તારીખ એટલે કે 1 મેથી ઘણા ફેરફારો લાગુ જઈ રહ્યા છે. આમાં ATM માંથી પૈસા ઉપાડવા પર લાગતા ચાર્જ સંબંધિત નિયમો પણ સામેલ છે. હોમ બેંક નેટવર્કની બહારના ATM મશીનમાંથી કોઈ ટ્રાન્ઝેક્શન કરવામાં આવે છે, અથવા બેલેન્સ ચેક કરવામાં આવે છે, તો હવે યુઝરે પહેલા કરતા વધુ ચાર્જ ચૂકવવા પડશે. આવા એટીએમનો ઉપયોગ કરવા માટે હજુ પણ ચાર્જ લાગુ પડે છે અને 1 મેથી તેમાં વધુ વધારો થવાનો છે.

સેન્ટ્રલ બેંક (RBI) એ તાજેતરમાં નેશનલ પેમેન્ટ કોર્પોરેશન ઓફ ઇન્ડિયા (NPCI) ના પ્રસ્તાવના આધારે ફી વધારવાની મંજૂરી આપી દીધી હતી. રિપોર્ટ અનુસાર, અત્યાર સુધી, જો ગ્રાહકો તેમના હોમ બેંકના ATM ને બદલે અન્ય નેટવર્ક બેંકના ATM માંથી પૈસા ઉપાડતા હતા, તો તેમને દરેક ટ્રાન્ઝેક્શન પર 17 રૂપિયાનો ચાર્જ ચૂકવવો પડતો હતો, જે 1 મેથી વધીને 19 રૂપિયા થઈ જશે. આ ઉપરાંત, જો તમે અન્ય કોઈપણ બેંકના ATM માંથી બેલેન્સ ચેક કરો છો, તો તેના પર 6 રૂપિયાનો ચાર્જ લાગતો હતો, જે હવે વધારીને 7 રૂપિયા કરી દેવામાં આવશે.

વ્હાઇટ-લેબલવાળા એટીએમ ઓપરેટરો દ્વારા એટીએમ ટ્રાન્ઝેક્શન ફીમાં વધારાની માંગ સતત કરવામાં આવી રહી હતી. તેમની દલીલ એવી હતી કે વધતા સંચાલન ખર્ચને ધ્યાનમાં રાખીને જૂની ફી ઓછી છે. NPCI ના પ્રસ્તાવને RBI દ્વારા મંજૂરી મળ્યા બાદ, નાની બેંકો પર દબાણ વધવાની શક્યતા છે. હકીકતમાં, તેમની મર્યાદિત માળખાગત સુવિધાને કારણે, તેઓ અન્ય બેંકોના ATM નેટવર્ક પર ખૂબ આધાર રાખે છે. મહત્ત્વનું છે કે વધેલી ઇન્ટરચેન્જ ફી એ રકમ છે જે એક બેંક બીજી બેંકને ચૂકવે છે જ્યારે તેનો કોઈ ગ્રાહક બીજી બેંકના ATM નો ઉપયોગ કરીને પૈસા ઉપાડે છે.

અહીં એ ઉલ્લેખનીય છે કે આ ચાર્જ ત્યારે લાગુ પડે છે જ્યારે બેંક યુઝર તેની ફ્રી માસિક ટ્રાન્ઝેક્શન લિમિટ પછી પૈસા ઉપાડે છે. મેટ્રો શહેરોમાં, હોમ બેંક સિવાય અન્ય બેંકોના ATM માંથી ફ્રી ટ્રાન્ઝેક્શન લિમિટ પાંચ નક્કી કરવામાં આવી છે, જ્યારે નોન-મેટ્રો શહેરોમાં આ ફ્રી ટ્રાન્ઝેક્શન લિમિટ મર્યાદા છે.