• કર્ણાવતી સ્કૂલની શિક્ષિકા દ્વારા બાળકી સાથે કરાયું જઘન્ય કૃત્ય

• 4 વર્ષની વિદ્યાર્થીનીના ગુપ્ત ભાગે ઇજા પહોચાડવાનો મામલો

• શિક્ષકા વિરુદ્ધ પ્રદ્યુમ્નનગર પોલીસ મથકમાં ફરિયાદ નોંધાય

• શિક્ષિકા નિર્દોષ હોવા અંગેનું શાળાના મેનેજિંગ ટ્રસ્ટીનું નિવેદન

• પોક્સો તેમજ એટ્રોસિટી કલમ હેઠળ ફરિયાદ નોંધવામાં આવી

રાજકોટ શહેરમાં સમગ્ર શિક્ષણજગતને લાંછન લગાવતી ઘટના સામે આવતાં ચકચાર મચી જવા પામી છે. માત્ર 4 વર્ષની બાળકીના પ્રાઇવેટ પાર્ટમાં બોલપેન અથવા એવી કોઈ વસ્તુ વડે શિક્ષિકાએ ઇજા પહોચાડી હોવાનો વાલીએ આક્ષેપ કર્યો છે, ત્યારે ફરિયાદના આધારે પ્રદ્યુમ્નનગર પોલીસે વધુ તપાસ હાથ ધરી છે.

રાજકોટમાં 4 વર્ષની બાળકીના ગુપ્તાંગના ભાગે ઇજા પહોંચાડવા મામલે પ્રદ્યુમ્નનગર પોલીસ સ્ટેશનમાં ફરિયાદ નોંધાઈ છે. રેલનગર વિસ્તારમાં આવેલી કર્ણાવતી ઇન્ટરનેશનલ સ્કૂલના મિત્તલબેન નામના શિક્ષિકા વિરુદ્ધ બાળકીની માતા દ્વારા ફરિયાદ નોંધાવવામાં આવી છે. પોલીસે ઇજા પહોંચાડવી, પોક્સો તેમજ એટ્રોસિટી સહિતની કલમ હેઠળ ફરિયાદ નોંધી કાયદેસરની કાર્યવાહી હાથ ધરી છે.

કર્ણાવતી ઇન્ટરનેશનલ સ્કૂલ ખાતે બાળકીને ગુપ્તાંગના ભાગે પેન વડે અથવા કોઈ અન્ય રીતે આંતરિક ઇજા પહોંચાડવામાં આવી હોવાનો ફરિયાદમાં ઉલ્લેખ કરવામાં આવ્યો છે, જ્યારે પરિવારના આ આક્ષેપોને શિક્ષિકાએ ખોટા ગણાવ્યા હતા. તો શાળાએ પણ 11 એપ્રિલના ક્લાસરૂમમાં CCTV ફૂટેજ જાહેર કર્યા છે, જેમાં આવી કોઈ ઘટના ન બની હોવાની વાત કરી તમામ આક્ષેપોને નકારવામાં આવ્યા છે.

રાજકોટના રેલનગર વિસ્તારમાં રહેતા યુવાનની 4 વર્ષની દીકરીનું ગત વર્ષ જૂન મહિનામાં રેલનગર વિસ્તારમાં આવેલી કર્ણાવતી ઇન્ટરનેશનલ સ્કૂલમાં કેજી નર્સરીમાં એડમિશન લેવા નિર્ણય કર્યો હતો, અને અંગ્રેજી માધ્યમમાં અભ્યાસ શરૂ કરાવ્યો હતો. દરમિયાન ગત 11 એપ્રિલ, 2025ના રોજ બાળકી સ્કૂલથી ઘરે આવી ત્યારે પોતાની માતાને જણાવ્યું હતું કે, મને ગુપ્તાંગની જગ્યાએ દુખે છે, જેથી ગરમીના કારણે બળતરા થતી હશે, એમ વિચારી માતાએ કાંઈ ખાસ ધ્યાન આપ્યું ન હતું. બીજા દિવસે ફરી સ્કૂલથી આવી બાળકીએ ખૂબ દુખાવો થતો હોવાની ફરિયાદ કરી હતી, જેથી માતાને કંઈક અજુગતું અને વહેમ જતાં તરત બાળકીના પિતાને જાણ કરી, આ દંપતી નજીકની ખાનગી હોસ્પિટલમાં બાળકીને લઈ ગયા હતાં.

બાળકીને તેની સ્કૂલમાં સાથે ભણતા અન્ય વિદ્યાર્થીઓ, ટીચર, શિક્ષક, સ્ટાફના ફોટા બતાવી કોણે તેને ગુપ્તાંગમાં ઇજા પહોંચાડી પૂછતાં બાળકીએ એક ટીચરના ફોટા પર હાથ મુક્યો હતો. ખાનગી હોસ્પિટલમાં સારવાર બાદ બાળકીને રાજકોટ સિવિલ હોસ્પિટલમાં ખસેડતાં છેલ્લા 2 દિવસથી જનાના હોસ્પિટલમાં સારવાર હેઠળ છે. સમગ્ર મામલે પ્રદ્યુમ્નનગર પોલીસે બાળકીની માતાની ફરિયાદ પરથી સ્કૂલના શિક્ષિકા વિરુદ્ધ ગુનો નોંધી વધુ તપાસ હાથ ધરી છે.