રાજકોટ જિલ્લાના ગોંડલ ખાતે બગસરા-રાજકોટ રૂટની એસ.ટી. બસમાંથી વિદેશી દારૂનો જથ્થો મળી આવતા ચકચાર મચી જવા પામી છે, ત્યારે આ દારૂનો જથ્થો કોનો છે અને ક્યાં લઈ જવામાં આવતો હતો, તે દિશામાં ગોંડલ પોલીસ દ્વારા વધુ તપાસ હાથ ધરવામાં આવી છે.

રાજકોટ જિલ્લાના ગોંડલમાં એસ.ટી. બસની અંદરથી વિદેશી દારૂની બોટલો સાથેનો થેલો મળી આવ્યો છે. બગસરા-રાજકોટ રૂટની બસમાંથી દારૂની બોટલો થેલો મળી આવતા ચકચાર મચી જવા પામી છે. ગોંડલથી એસ.ટી. બસ રાજકોટ આવવા માટે નીકળી હતી, ત્યારે કોલેજ ચોક બસ સ્ટોપ પર પેસેન્જરના ધ્યાને થેલો આવતા તેને સમગ્ર મામલાની જાણ બસના કંડકટર તેમજ ડ્રાઈવરને કરી હતી.

બસના ડ્રાઈવર દ્વારા તાત્કાલીક અસરથી ગોંડલ સિટી પોલીસમાં જાણ કરાતા પોલીસ કાફલો પણ ઘટના સ્થળે દોડી આવ્યો હતો. સમગ્ર મામલે મળી આવેલા દારૂનો જથ્થો કોનો છે અને ક્યાં લઈ જવામાં આવતો હતો, તે દિશામાં ગોંડલ પોલીસ દ્વારા તપાસ હાથ ધરવામાં આવી છે. ગોંડલ સિટી પોલીસના અધિકારીઓ થેલો ચેક કરતાં 12 નંગ દારૂની બોટલ મળી આવી હતી. ત્યારે હવે એસ.ટી બસમાં પણ આ પ્રકારનો કીમિયો અપનાવી દારૂની હેરાફેરી કરતાં બુટલેગરોએ જાણે પોલીસને પડકાર ફેંક્યો હોય તેમ લાગી રહ્યું છે.