સુરત: બોગસ પત્રકારે દેહવેપાર કરતાં ઈસમ પાસે રૂપિયા માંગ્યાઅને બોગસ પત્રકારનો મળ્યો મૃતદેહ,જુઓ શું છે ચકચારી મામલો

સુરત જિલ્લાના ઓલપાડ તાલુકાના સાયણ ખાતે દેહ વ્યાપાર કરતાં શખ્સે ગત 9 માર્ચના રોજ શેખપુર ગામેથી મળી આવેલ અજાણ્યા યુવાનની હત્યા કરી હતી. મૃતક યુવાન અવાર નવાર દેહવ્યાપાર કરાવતા શખ્સ પાસેથી પૈસાની માંગણી કરતો હોય જેથી ત્રાસી ગયેલ શખ્સે   યુવાનની હત્યા કરી પુરાવાનો નાશ કરી દીધો હતો.

ગત તારીખ 9 માર્ચના રોજ સુરત જિલ્લાના કામરેજ તાલુકાના શેખપુર ગામની સીમમાં નહેરની બાજુમાં આવેલ રસ્તા પરથી તીક્ષ્ણ હથિયાર વડે હત્યા કરાયેલ અજાણ્યા યુવાનનો મૃતદેહ મળી આવ્યો હતો. પુરાવા નાશ કરવા મૃતદેહને સળગાવી દેવામાં આવ્યો હતો. આ બનાવની તપાસ સુરત ગ્રામ્ય ક્રાઇમ બ્રાન્ચની ટીમને સોપવામાં આવી હતી દરમ્યાન પોલીસને બાતમી મળી હતી કે શેખપુર ગામે જે અજાણ્યા યુવાનની હત્યા કરવામાં આવી હતી તે યુવાન સૌરાષ્ટ્રના સોમનાથ જિલ્લાના હદમળિયા ગામનો વિજય  દેસાણી છે અને જેની હત્યા સાયણ ગામે મહાદેવધામ સોસાયટીમાં રહેતા ભરત કુકડિયાએ કરી હોવાનું બહાર આવ્યું હતું. પોલીસે ભરત કુકડિયાને દબોચી લઈ કડક પૂછપરછ કરતાં ચોંકાવારો ખુલાસો થયો હતો. 

ભરત કુકડિયા સાયણ ગામે પોતાના મકાનમાં દેહવ્યાપારનો વેપલો કરતો હતો જ્યાં બે વર્ષ અગાઉ રીયા નામની યુવતી દેહવ્યાપાર કરવા માટે આવી હતી. જેને મૃતક વિજય દેસાણિ ઓળખતો હોય જે પોતે પત્રકાર હોવાનું જણાવી રીયા પાસે અવર નવાર રૂપિયા લેતો હતો જેમાં રીયા અને વિજય વચ્ચે ઝગડો થતાં રીયા વતન જતી રહી હતી. વિજય ભરત કુકડિયા પાસે પત્રકાર હોવાની ઓળખ આપી અવાર નવાર રૂપિયા પડાવતો હતો.જેનાથી ત્રાસી ભરતે વિજયની હત્યા કરવાનું નક્કી કર્યું હતું.

ગત 8 માર્ચના રોજ વિજયે ભરતને ફોન કરી તેના રૂમ પર બોલાવ્યો હતો અને પ્લાન મુજબ ઠંડા પાણીમાં ઘેનની દવા પીવડાવ્યા બાદ છરીના ઘા મારી તેની હત્યા કરી દીધી હતી ત્યારબાદ વિજયનો મૃતદેહ એક કારમાં મૂકી શેખપુર ગામે લઈ જઈ તેના ઉપર ડીઝલ નાંખી મૃતદેહ સળગાવી દેવામાં આવ્યો હતો આ ગુનામાં ભરતે કાયદાના સંઘર્ષમાં આવેલ ત્રણ કિશોરોની મદદ લીધી હોય પોલીસે તમામને ઝડપી પાડ્યા હતા.

હત્યા બાદ પુરાવા નાશ કરવા માટે રૂમમાં કલર કરાવી નાંખ્યો હતો અને જે બેડ અને સેટી ઉપર લોહીના છાંટા ઊડ્યાં હતા તે બેડ અને સેટી તેમજ ગાદલાં તેણે સળગાવી દીધા હતા આ ઉપરાંત હથિયારો પણ અવાવરુ જગ્યાએ નહેરના પાણીમાં ફેંકી દીધા હતા.પોલીસે આરોપીની ધરપકડ કરી કાયદેસરની કાર્યવાહી હાથ ધરી છે.