• રાજ્યમાં સ્માર્ટ મીટરના વિરોધમાં વધુ એક હુમલાની ઘટના

• સ્માર્ટ મીટર લગાવવા ગયેલા કર્મચારી પર જીવલેણ હુમલો

• કોસાડ વિસ્તારમાં કર્મચારી પર 4 શખ્સો બેફામ તૂટી પડ્યા

• શખ્સે કહ્યું : બીજીવાર દેખાઈશ તો જીવતો નહીં રહેવા દઉં

• મહિલા સહિત 4 લોકોની ધરપકડ સાથે પોલીસ તપાસ શરૂ

સુરત શહેરના કોસાડ વિસ્તારમાં સ્માર્ટ મીટર લગાવવા ગયેલા કર્મચારી પર 4 શખ્સો તૂટી પડ્યા હતા. આ બનાવમાં અમરોલી પોલીસે મહિલા સહિત 4 લોકોની ધરપકડ કાયદેસરની કાર્યવાહી હાથ ધરી છે.

સુરતમાં DGVCL કંપની અને અલેથીયા નામની પ્રાઇવેટ કંપનીના કર્મચારીઓ સ્માર્ટ મીટર લગાડવાનું કામ શહેરભરમાં કરી રહ્યા છે. સ્માર્ટ મીટરને લઈને લોકોમાં હજી પણ ઘણી બધી માન્યતાઓ હોવાના કારણે સ્થાનિકો અને કંપનીના કર્મચારીઓ વચ્ચે અવારનવાર ઘર્ષણની ઘટના સામે આવતી રહે છે, ત્યારે વધુ એક મારામારીની ઘટના સુરતના કોસાડ વિસ્તારમાંથી સામે આવી છે. DGVCL અને અલેથીયા કંપનીના કર્મચારીઓ અમરોલીના કોસાડ આવાસમાં A તથા B વિભાગની બિલ્ડિંગના મીટર બદલવાના હોવાથી ત્યાં ગયા હતા, જ્યાં બિલ્ડિંગના રહીશોને મીટર બદલી સ્માર્ટ મીટર લગાડી આપવાનું જણાવ્યા બાદ બિલ્ડિંગના લોકોએ મીટર બદલવાની હા પાડતા કામગીરી શરૂ કરવામાં આવી હતી.

આ સમયે એક અજાણ્યા વ્યક્તિ દ્વારા કર્મચારીઓને અપશબ્દો બોલવામાં આવ્યા હતા, અને બાદમાં 4 જેટલા શખ્સોએ કર્મીને ઢીક્કા-મૂક્કાથી માર માર્યો હતો. જોકે, કર્મીઓ પર થયેલા હુમલાની ઘટનાનો વીડિયો પણ સામે આવ્યો છે.

આ ઘટનામાં કર્મચારીને ડાબા હાથે અને કોણીના ભાગે મૂંઢ ઇજા પહોંચી હતી. આ સાથે એક વ્યક્તિ દ્વારા ધમકી આપવામાં આવી હતી કે, બીજીવાર દેખાઈશ તો હાથ-પગ તોડી નાખીશ, અને જીવતો નહીં રહેવા દઉં. આ સમયે હાજર અન્ય સહકાર્મચારીઓ દ્વારા 100 નંબર પર ફોન કરી પોલીસને જાણ કરાય હતી, ત્યારે હાલ તો અમરોલી પોલીસ દ્વારા એક મહિલા સહિત 4 આરોપીઓની ધરપકડ કરી કાયદેસરની કાર્યવાહી હાથ ધરવામાં આવી છે.