• અઠવામાં પોલીસ કોન્સ્ટેબલ ઉપર બુલેગરે કાર ચઢાવી

• વાહન ચેકિંગમાં દરમિયાન બુટલેગરે કોન્સ્ટેબલને ઉડાવ્યો

• બુટલેગરની કાર બંધ થઈ જતા પોલીસે પકડી પાડ્યો

• પોલીસે ગુન્હો નોંધી આગળની કાર્યવાહી હાથ ધરી

• આરોપી ચિત્રાર્થ ઉર્ફે ચિન્ટુ રાંદેરી લિસ્ટેડ બુટલેગર

• પોલીસ મથકમાં PSOનો માર્યો લાફો

સુરતની અઠવા લાઈન્સ પોલીસ મળસ્કે નાનપુરા ટીમલિયાવાડ ત્રણ રસ્તા પાસે વાહન ચેકિંગ કરતી હતી. ત્યારે અઠવાગેટ તરફથી કારમાં આવતા નાનપુરાના વોન્ટેડ બૂટલેગરે હેડ કોન્સ્ટેબલને ઉડાવતા તેને ઈજા થઈ હતી.બૂટલેગરથી પહેલા રાઉન્ડમાં ટક્કરના વાગી તો યુ-ટર્ન લઈ ફરી આવ્યો અને હેડ કોન્સ્ટેબલને ઉડાવ્યો હતો.

સુરતના અઠવા લાઈન્સ પોલીસ સ્ટેશનમાં ફરજ બજાવતા હેડ કોન્સ્ટેબલ કારા જાદવભાઈ મધરાતે પેટ્રોલિંગ કરી એક વાગ્યાથી ત્રણ વાગ્યા દરમિયાન ટીમલિયાવાડ ત્રણ રસ્તા પાસે પીસીઆર 33 અને 34ના સ્ટાફ સાથે વાહન ચેકિંગ કરતા હતા. ત્યારે અઠવાગેટ તરફથી એક કાર આવતા કારાભાઈએ તેને રોકવા ઈશારો કર્યો હતો.કારચાલકે કાર ઊભી રાખવાના બદલે ફુલ સ્પીડમાં ભગાવી ત્યારબાદ ફરી પરત આવ્યો અને હેડ કોન્સ્ટેબલ કારાભાઇને કારથી જોરદાર ટક્કર મારી ઉડાવી દીધા હતા. હવામાં ફંગોળાઈને જમાદાર બોનેટ પર પટકાયા હતા. જમાદાર બોનેટ પરથી જમીન પર પડ્યા હતા અને કારચાલકે ભાગી છૂટવાનો પ્રયાસ કર્યો હતો.

અન્ય પોલીસકર્મીઓ પીસીઆરમાં પીછો કરતા કારચાલક ગાંધી સ્મૃતિ ભવન પાસેથી યુ-ટર્ન લઈ અઠવાગેટ તરફ ભાગવાની ફિરાકમાં હતો. જોકે, કૈલાશ રેસ્ટોરન્ટ પાસે કાર અચાનક બંધ થઈ જતા પોલીસે કાર ચાલકને પકડી પાડ્યો હતો. અઠવા પોલીસે કાર ચાલક ચિત્રાર્થ ઉર્ફે ચિતરાજ ઉર્ફે ચિન્ટુ ભરત રાંદેરીને સકંજામાં લઈ સરકારી વાહનમાં બેસાડવા પ્રયાસ કરતા તેણે અહીં પણ આનાકાની કરી, વિરોધ કરી ભાગવાની કોશિશ કરી હતી.વધુમાં પોલીસ મથકમાં પણ PSOને લાફો ઝીંકી દીધો હોવાનું જાણવા મળ્યું છે.