સુરત : ગેસ સિલિન્ડરમાં બ્લાસ્ટ થતાં ફાટી નીકળેલી આગને બુઝાવતી વેળા વધુ એક બ્લાસ્ટ, 2 ફાયરના જવાનો ઘાયલ

• પુણા વિસ્તારના એક મકાનના ત્રીજા માળે આગ લાગી

• ગેસ સિલિન્ડર બ્લાસ્ટ થઈ આગ ફાટી નીકળતા દોડધામ

• ઘટના સ્થળે દોડી આવેલા ફાયરના જવાનોને પણ ઇજા

• આગ બુઝાવવાની કામગીરી દરમ્યાન સિલિન્ડર બ્લાસ્ટ

• ગંભીર રીતે ઇજાગ્રસ્ત ફાયરના 2 જવાનો સારવાર હેઠળ

સુરત શહેરના પુણા વિસ્તારમાં એક મકાનના ત્રીજા માળે ગેસ સિલિન્ડર બ્લાસ્ટ થતાં આગ ફાટી નીકળી હતી. બનાવના પગલે ઘટના સ્થળે દોડી આવેલા ફાયરના જવાનો આગ બુઝાવવાની કામગીરી કરી રહ્યા હતા, તે દરમિયાન અન્ય સિલિન્ડર બ્લાસ્ટ થતાં ફાયર વિભાગના 2 જવાનોને ગંભીર ઈજા પહોચી હતી.

મળતી માહિતી અનુસાર, સુરત શહેરના પુણા વિસ્તારમાં આવેલી સીતાનગર ચોકડી પાસે વિક્રમનગર સોસાયટી આવેલી છે, જ્યાં 3 માળનું એક મકાન આવેલું છે. જેમાં ત્રીજા માળે કેટલાક રૂમ કામદારોને ભાડે આપવા માટે બનાવવામાં આવ્યા છે. જેમાં એમ્બ્રોડરીના ખાતા અને હીરામાં કામ કરતા કામદારો રહે છે, ત્યારે સવારના સમયે કામ અર્થે જવા માટે રૂમમાં રહેલા કારીગર ઉઠ્યા હતા, અને રસોઈ બનાવવાની કામગીરી શરૂઆત કરે તે પહેલા જ ગેસ સિલિન્ડર લીકેજ હોવાથી આગ ફાટી નીકળી હતી. જોકે, રૂમમાં રહેલા તમામ કામદારો બહાર નીકળી ગયા હતા.

બનાવના પગલે પુણા, કાપોદ્રા અને ડુંભાલ ફાયર સ્ટેશનની 6 જેટલી ગાડીઓ ઘટનાસ્થળે દોડી આવી હતી. ત્યારબાદ ત્રીજા માળે ફાયરના જવાનો પહોંચ્યા હતા. આ દરમિયાન ગેસ સિલિન્ડર સળગી રહ્યો હતો. આ સમયે અચાનક જ અન્ય એક ગેસ સિલિન્ડરમાં બ્લાસ્ટ થયો હતો. જેના પગલે આગ બુઝાવવાની કામગીરી કરવા પહોંચેલા ફાયરના 2 જવાનો ઇજાગ્રસ્ત થયા હતા. ઈજાગ્રસ્ત જવાનોને તાત્કાલિક સારવાર અર્થે હોસ્પિટલમાં ખસેડવામાં આવ્યા હતા. તો બીજી તરફ ફાયરના જવાનોએ સિલિન્ડર બ્લાસ્ટથી લાગેલી આગ ઉપર પાણીનો મારો ચલાવી કાબૂમાં લીધી હતી.