• વરાછામાં 16 વર્ષીય કિશોરી સાથે દુષ્કર્મનો બનાવ

• ફાર્મ હાઉસમાં લઈ જઈ કેફી પદાર્થ પીવડાવી આચર્યું દુષ્કર્મ

• દુષ્કર્મનો વિડિયો બનાવી વાયરલ કરવાની ધમકી આપી

• ઘટના સંદર્ભે પોલીસ મથકે નોંધાઈ ફરિયાદ

• પોલીસે કરી નરાધમ આરોપીની ધરપકડ કરી

સુરતમાં સોશિયલ મીડિયા પર થયેલી મિત્રતામાં સગીરા દુષ્કર્મનો ભોગ બની હતી.નરાધમ યુવકે યુવતીને ફાર્મ હાઉસમાં કેફી પદાર્થ પીવડાવીને બળાત્કાર ગુજાર્યો હતો,જે ઘટનામાં પોલીસે આરોપી યુવકની ધરપકડ કરી હતી.

સુરતના વરાછા વિસ્તારમાં રહેતી 16 વર્ષની કિશોરી તેના મિત્રો મારફતે વરાછા સીતાનગર અર્ચના રોડ પર આવેલ ઈશ્વરનગર સોસાયટીમાં રહેતા હાર્દિક ઘુસાભાઈ કાછડના સંપર્કમાં સોશિયલ મીડિયાથી આવી હતી. ત્યારબાદ હાર્દિકે તેની સાથે વાતચીત કરી મિત્રતા કરી હતી,અને કિશોરીને પોતાની વાતોમાં ફસાવી લગ્ન કરવાની લાલચ આપી હતી. હાર્દિક તેને ફરવાના બહાને ફાર્મ હાઉસમાં લઈ ગયો હતો.જ્યાં કિશોરીને નશીલા પદાર્થવાળુ પીણું પીવડાવી દીધું હતું.

નશીલા પીણાના કારણે કિશોરી અર્ધ બેભાન થઈ જતા તેના બિભત્સ ફોટાઓ પાડી લઈ મોબાઈલમાં વીડિયો ઉતારી લીધા હતા,અને ત્યારબાદ આ ફોટો-વીડિયો વાયરલ કરવાની ધમકી આપી તેની સાથે બળજબરીથી શારીરિક સંબંધ બાંધી બળાત્કાર ગુજાર્યો હતો. ફક્ત એટલું જ નહીં પરંતુ, બાદમાં અવારનવાર તેને આ ફોટો-વીડિયોના આધારે બ્લેકમેઈલ કરી મળવા માટે બોલાવી શારીરિક સંબંધો બાંધી સમય પસાર કર્યો હતો.

વધુમાં હાર્દિકનો મિત્ર સની નામના યુવકે પણ અવારનવાર કિશોરીને ઇન્સ્ટાગ્રામમાં મેસેજ કરી આ વાતની જાણ ઘરે કે પોલીસને કરશે તો તેને મારી નાખવાની ધમકી આપી હતી. જેથી આખરે ભોગ બનનાર કિશોરીએ વરાછા પોલીસ મથકમાં ફરિયાદ નોંધાવતા પોલીસે બંને યુવકો સામે બળાત્કારનો ગુનો દાખલ કરી આરોપી હાર્દિક કાછડની ધરપકડ કરી વધુ કાર્યવાહી હાથ ધરી છે.