સુરત: ઉધના વિસ્તારમાં બાઈક મુકવા જેવી સામાન્ય બાબતમાં યુવકની હત્યાથી ચકચાર

• ડાયમંડ સીટીમાં ક્રાઇમની ઘટનામાં વધારો

• ઉધના વિસ્તારમાં હત્યાનો બનાવ

• સામાન્ય બાબતમાં યુવકની હત્યા

• બાઈક મુકવા બાબતે યુવકની ચપ્પુ મારી હત્યા

• આરોપીની કરાઈ ધરપકડ 

સુરત શહેરમાં ક્રાઇમની ઘટનામાં સતત વધારો થઈ રહ્યો છે. ત્યારે વધુ એક હત્યાની ઘટના ઉધના વિસ્તારમાં સામે આવી છે. બાઈક મુકવા બાબતે થયેલી બોલાચાલીમાં એક ઈસમ દ્વારા યુવકની હત્યા કરી દેવામાં આવી છે.તીક્ષ્ણ હથિયારના ઘા ઝીંકી યુવકને ગંભીર રીતે ઇજાગ્રસ્ત કરવામાં આવ્યો હતો અને ગંભીર ઈજાના કારણે યુવકનું સારવાર દરમિયાન મોત થયું હતું.હુમલાખોરને સ્થાનિક લોકો દ્વારા ઝડપી પાડવામાં આવ્યો હતો અને પોલીસના હવાલે કરવામાં આવ્યો હતો.

સુરતના ઉધના પોલીસ સ્ટેશન હદ વિસ્તારમાં મહાવીર કોમ્પ્લેક્સમાં દુકાન ધરાવતા સુભાષ નામના વ્યક્તિ સાંજના પાંચ વાગ્યા દરમિયાન આવ્યા હતા. તે સમયે નીરજ નામના ઈસમ સાથે તેમને બાઈક મુકવા બાબતે બોલાચાલી થઈ હતી. નીરજ અને સુભાષ વચ્ચે બોલાચાલી થયા બાદ ઝઘડો ઉગ્ર બની ગયો હતો.આ સમગ્ર ઘટનાના લાઈવ CCTV પણ સામે આવ્યા હતા.

જેમાં ઝઘડો ઉગ્ર બનતાની સાથે જ નીરજ અને સુભાષ ઝપાઝપી પર ઉતરી આવ્યા હતા અને આ ઝપાઝપી દરમિયાન નીરજ દ્વારા પોતાની પાસે રહેલા ચપ્પુ વડે સુભાષ પર હુમલો કરી દેવામાં આવ્યો હતો. સુભાષને નીરજે ચપ્પુના ઘા મારી દેતા સુભાષ ગંભીર રીતે ઈજાગ્રસ્ત થયો હતો અને ઘટના સ્થળ પર જ ઘણું લોહી પણ વહી ગયું હતું. તો બીજી તરફ આસપાસના દુકાનદારો તાત્કાલિક ઘટના સ્થળ પર એકઠા થઈ ગયા હતા અને સુભાષ પર હુમલો કરનારા નીરજને ઝડપી પાડ્યો હતો અને તાત્કાલિક અસરથી ગંભીર રીતે ઈજાગ્રસ્ત થયેલા સુભાષને સારવાર માટે હોસ્પિટલમાં ખસેડવામાં આવ્યો હતો.

ખાનગી હોસ્પિટલમાં પ્રાથમિક સારવાર દરમિયાન જ સુભાષે અંતિમ શ્વાસ લીધા હતા. તો બીજી તરફ ઘટનાની જાણ થતા ઉચ્ચ પોલીસ અધિકારીઓ  સહિતના પોલીસ અધિકારીઓ ઘટના સ્થળ પર પહોંચ્યા હતા અને પોલીસ દ્વારા સમગ્ર મામલે નીરજ નામના ઈસમ સામે હત્યાનો ગુનો દાખલ કરીને નીરજની ધરપકડ કરવામાં આવી છે. તો બીજી તરફ ઘટના સ્થળની આસપાસ લાગેલા CCTV ફૂટેજના આધારે પણ પોલીસ દ્વારા વધુ તપાસ હાથ ધરવામાં આવી છે.