સુરત સ્મીમેર હોસ્પિટલ ખાતે આવેલ ગ્લોબલ ટેક્સટાઇલ માર્કેટમાં રાજ્યના મુખ્યમંત્રી ભુપેન્દ્ર પટેલની ઉપસ્થિતિમાં ફેબ્રિક એક્સપોનું ઉદ્ઘાટન કરવામાં આવ્યું હતું. જેમાં ભાજપ પ્રદેશ અધ્યક્ષ સી.આર.પાટીલે આમ આદમી પાર્ટીનું નામ લીધા વિના શાબ્દિક પ્રહાર કર્યા હતા.

સુરતની સ્મીમેર હોસ્પિટલ ખાતે આવેલ ગ્લોબલ ટેક્સટાઇલ માર્કેટમાં ફેડરેશન ઓફ ગુજરાત એસોસિએશન દ્વારા ફેબ્રિક એક્સ્પોના ઉદ્ઘાટન પ્રસંગે ગુજરાત રાજ્યના મુખ્યમંત્રી ભુપેન્દ્ર પટેલ, કેન્દ્રીય રેલ્વે અને ટેક્સટાઇલ રાજ્ય મંત્રી દર્શના જરદોશ, ગુજરાત ભાજપ પ્રદેશ પ્રમુખ સી.આર.પાટીલ, રાજ્યના ગૃહ મંત્રી હર્ષ સંઘવી સહિત ઉદ્યોગકારો ઉપસ્થિત રહ્યા હતા. આ દરમ્યાન ઉદબોધન કરતા ભાજપ પ્રદેશ અધ્યક્ષ સી.આર.પાટીલે નામ લીધા વિના આમ આદમી પાર્ટી પર શાબ્દિક પ્રહાર કર્યા હતા. સી.આર.પાટીલે જણાવ્યું હતું કે, આપના વાયદા ચાઈનીઝ છે. તેઓ 10 લાખ નોકરી આપવાની વાત કરે છે. કેજરીવાલે જુઠ્ઠું બોલવું, તો વધારે બોલવું એવું છે.

સમગ્ર દેશમાં ગુજરાત યુવાનોને સૌથી વધારે રોજગાર આપે છે. જે વચન આપવા આવે છે એને સમજી લેવું જોઈએ. તેઓએ વધુમાં જણાવ્યુ હતું કે, હમણાં એક ભાઈ આવે છે, અને મફત પાણીની વાત કરે છે. અને કહે છે કે, અમે ફ્રીમાં વીજળી આપીશું. પરંતુ પાવર આવશે કે, કેમ તે એક સવાલ છે. ગુજરાતના યુવાઓને પણ નોકરીની લાલચ આપી છે. સાડા પાંચ લાખ નોકરીની સરકારે જાહેરાત કરી છે, ત્યારે આ ભાઈ 10 લાખ નોકરીની જાહેરાત કરે છે. પણ તે કેવી રીતે કરશે, તે નક્કી નથી. ગુજરાત રાજ્ય આખા દેશમાં સૌથી વધુ રોજગારી આપતું રાજ્ય હોવાનું પણ સી.આર.પાટીલે જણાવ્યુ હતું.