વડોદરા : સિગ્નલ તોડીને ભાગતા કાર ચાલકે પોલીસ પર કાર ચડાવી દેવાનો કર્યો પ્રયાસ,પોલીસકર્મી ઇજાગ્રસ્ત

• વડોદરામાં કાર ચાલકની બેલગામ રફ્તાર

• સિગ્નલ તોડીને પોલીસકર્મી પર કાર ચડાવી દેવાનો કર્યો પ્રયાસ

• પોલીસકર્મી રોડ પર પછડાટ થયો ઘાયલ

• પોલીસે કાર ચાલકની ઘરેથી કરી ધરપકડ

• હત્યાના પ્રયાસ સહિતની કલમ હેઠળ ગુન્હો દર્જ

વડોદરાના સમા ટી પોઇન્ટ પાસે બુધવારે પૂરપાટ કાર હંકારી ચાલકે સિગ્નલ તોડી પોલીસ કર્મી પર કાર ચડાવી દેવાનો પ્રયત્ન કર્યો હતો.ચાલકે પોલીસ કર્મીને રોડની વચ્ચો વચ ફંગોળ્યા હતા. જેમાં પોલીસકર્મી ઘાયલ થયો હતો. આ મામલે સમા પોલીસે હત્યાના પ્રયાસ સહિતનો ગુનો નોંધી કાર ચાલકની ધરપકડ કરી હતી.

વડોદરા  ટ્રાફિક પોલીસના હેડ કોન્સ્ટેબલ અજીતસિંહ ઉદેસિંહ સમા ટી પોઇન્ટ (એબેક્સ સર્કલ) અમિતનગર સર્કલ તરફ જવાના રોડ પર ફરજ પર હાજર હતા. અજીતસિંહ ટ્રાફિક નિયમન કરાવતા હતા. ત્યારે સવારે દસ વાગ્યાની આસપાસ જીજે-06-પીએસ-0225 કારનો ચાલક ઓનેસ્ટ ચાર રસ્તાથી સમા ટી પોઇન્ટ સર્કલ ઉપર પૂર ઝડપે આવી સિગ્નલ તોડ્યું હતું.

જેથી અજીતસિંહે દુરથી તેની કાર ઉભી રાખવાનો ઈશારો કર્યો હતો. જોકે ચાલકે કાર ઉભી ન રાખી હેડ કોન્સ્ટેબલ અજીતસિંહ પર કાર ચડાવી દેવાનો પ્રયાસ કરતા અજીતસિંહ રોડ પર પછડાયા હતા. જેમાં તેમને ખભા સહિતના ભાગે ફેક્ચર થયું હતું. અજીતસિંહને તાત્કાલિક સારવાર માટે સયાજી હોસ્પિટલ લઈ જવાયા હતા. કાર નંબરના આધારે પોલીસે કાર ચાલક વેમાલી પટેલ ફળિયામાં રહેતા અર્પિત જીતેન્દ્ર પટેલને તેના ઘરેથી પકડી પાડ્યો હતો. જોકે પોલીસે ગણતરીના કલોકામાં જ ફરાર થયેલા કાર ચાલકને ઝડપી પાડી કાયદેસરની કાર્યવાહી હાથ ધરી હતી.