પાડોશી દેશ શ્રીલંકામાં પેટ્રોલ ડિઝલના ભાવ વધ્યા, જાણો કેટલા ટકાનો કરાયો વધારો

આર્થિક સંકટનો સામનો કરી રહેલા શ્રીલંકાએ મંગળવારે પેટ્રોલના ભાવમાં 24.3 ટકા અને ડીઝલના ભાવમાં 38.4 ટકાનો વધારો કર્યો છે. વિદેશી મુદ્રા ભંડારના અભાવને કારણે શ્રીલંકા ગંભીર આર્થિક સંકટનો સામનો કરી રહ્યું છે, જેના કારણે આ વધારો કરવામાં આવ્યો છે. પાડોશી દેશમાં 19 એપ્રિલ પછી ઈંધણના ભાવમાં આ બીજો વધારો છે. આ સાથે, સૌથી વધુ ઉપયોગમાં લેવાતા ઓક્ટેન 92 પેટ્રોલની કિંમત પ્રતિ લિટર રૂ. 420 ($1.17) અને ડીઝલની કિંમત પ્રતિ લિટર રૂ. 400 ($1.11) થશે, જે અત્યાર સુધીનું સૌથી વધુ છે.

મળતી માહિતી અનુસાર, ભારતની અગ્રણી ઓઈલ કંપની ઈન્ડિયન ઓઈલ કોર્પોરેશનની શ્રીલંકાની પેટાકંપની લંકા આઈઓસીએ પણ ઈંધણના છૂટક ભાવમાં વધારો કર્યો છે. LIOC CEO મનોજ ગુપ્તાએ કહ્યું કે અમે સિલોન પેટ્રોલિયમ કોર્પોરેશન (CPC) સાથે મેળ ખાતી કિંમતોમાં વધારો કર્યો છે. CPC એ શ્રીલંકામાં જાહેર ક્ષેત્રની તેલ કંપની છે.