લોકપ્રિય સીરિયલ ‘શ્રી કૃષ્ણ’ 3 મેથી ડીડી નેશનલ પર પ્રસારિત થશે

લોકડાઉન દરમિયાન ઘરે સમય વિતાવતા દેશના લોકો હવે બીજી લોકપ્રિય ધાર્મિક સીરિયલ જોઈ શકશે. શ્રી કૃષ્ણનું ટેલિકાસ્ટ 3 મેથી દૂરદર્શન રાષ્ટ્રીય ચેનલ પર શરૂ કરવામાં આવશે. શ્રી કૃષ્ણના મહિમા પર આધારીત આ સીરીયલ રોજ રાત્રે 9 વાગ્યાથી પ્રસારિત કરવામાં આવશે. કેન્દ્રીય માહિતી અને પ્રસારણ પ્રધાન પ્રકાશ જાવડેકરે આ બાબતે માહિતી આપી છે.

પ્રકાશ જાવડેકરે શનિવારે ટ્વીટ કરીને જણાવ્યું હતું કે, રવિવાર, 3 મેથી રોજ 9 કલાકે મળશું. ભગવાન શ્રી કૃષ્ણના મહિમાની કથા શ્રી કૃષ્ણ સાથે, ફક્ત ડીડી નેશનલ ચેનલ પર, જરૂર જોજો.

https://twitter.com/PrakashJavdekar/status/1256506194417483777

રામાયણ અને ઉત્તર રામાયણના પ્રસારણ પછી દૂરદર્શન હવે શ્રી કૃષ્ણ સિરીયલ પણ ટેલીકાસ્ટ કરવાનો નિર્ણય લીધો છે. ઉલ્લેખનીય છે કે, આ પ્રખ્યાત સિરિયલ રામાયણનું નિર્માણ કરનારા નિર્દેશક રામાનંદ સાગર દ્વારા બનાવવામાં આવી હતી. રામાનંદ સાગરની ટીવી સીરિયલ શ્રી કૃષ્ણમાં ભગવાન કૃષ્ણની ભૂમિકા ભજવીને સર્વદમન ડી બેનર્જીએ શ્રોતાઓમાં છાપ ઉભી કરી છે.