ધોરાજી સોનાની લૂંટ ની ઘટના માં 6 આરોપીઓ ઝડપાયા
રાજકોટ ના ધોરાજી ખાતે મુથુટ ફાયનાન્સની ઓફિસમાં 5 કિલો સોનાની લૂંટની ઘટનામાં પોલીસે 24 કલાક માંજ ઘટનાનો ભેદ ઉકેલી કાઢયો છે.અને 6 આરોપીઓની ધરપકડ કરી હતી.
રાજકોટના ધોરાજીમાં તારીખ 26મી ની સવારે મુથુટ ફાયનાન્સ ની ઓફિસમાં હથિયાર ધારી લૂંટારુઓએ બંદૂક અને ચપ્પુની અણીએ 5 કિલો સોનુ કિંમત રૂપિયા 90 લાખના મુદ્દામાલ ની લૂંટ ચલાવી હતી.જોકે 24 કલાકમાં જ રાજકોટ રૂલર પોલીસે 6 આરોપીઓ ની ધરપકડ કરી હતી.
જાણવા મળ્યા મુજબ ધોરાજી તાલુકાના કલાણા ગામમાં રહેતો અને સસ્તા અનાજની દુકાન ધરાવતો અશ્વિન દિનેશ ચૌહાણની આર્થિક પરિસ્થિતિ કહરબ હોવાના કારણે અને દેવું વધી જવાના કારણે લૂંટનો માસ્ટર પ્લાન તૈયાર કર્યો હતો.અને હથિયાર તેમજ બાઈક આપીને લૂંટ બાદ ત્રણેય લૂંટારુઓને બહાર કાઢવાનું કામ ચોટીલાના પ્રવીણ ગીગા વાળાએ કર્યું હતું,જયારે સફળતા પૂર્વક લૂંટને પાર પાડવા માટે માણસો લાવવાનું કામ વીરપુરના રવિ લક્ષ્મણ ચાવડાએ કર્યું હતુ.
આ ત્રણેયની ધરપકડની સાથે પોલીસે લૂંટને અંજામ આપનાર સુનિલ દિનેશ ભાસ્કર,અશોક રવજી પરમાર અને રાજેશ ઉર્ફે ભૂરો પરબત બગડાની પણ ધરપકડ કરીને લૂંટેલા સોનાનો મુદ્દામાલ રિકવર કર્યો હતો.
પોલીસે લૂંટારુઓની માહિતી આપનાર માટે રૂપિયા 2 લાખના ઇનામની પણ જાહેરાત કરી હતી.વધુમાં લૂંટારુઓ લૂંટને અંજામ આપીને ધોરાજી હાઇવે પરથી પ્રસાર થયા હતા અને તેઓ સીસીટીવી કેમેરામાં પણ કેદ થતા પોલીસે નાકાબંધી કરીને તેઓને દબોચી લીધા હતા.લૂંટ પાછળનો તેઓનો બીજો હેતુ માત્ર મોજશોખ કરવાનો હોવાનું પણ પોલીસ જણાવી રહી છે.
