અમદાવાદ : નરોડામાં ત્રીજા માળેથી લિફ્ટ સીધી બેઝમેન્ટમાં પડતા ચકચાર,ત્રણ લોકોને સામાન્ય ઈજા

• નરોડામાં બિલ્ડિંગમાં સર્જાઈ ઘટના

• ત્રીજા માળેથી લિફ્ટ બેઝમેન્ટમાં ફસડાઈ

• લિફ્ટમાં સવાર લોકોના જીવ તાળવે ચોંટ્યા

• ફિફ્ટમાં સવારનો થયો આબાદ બચાવ

• રેસ્ક્યુ કરીને લિફ્ટમાં ફસાયેલા લોકોને બહાર કઢાયા  

અમદાવાદ શહેરના નરોડા વિસ્તારમાં લિફ્ટ ત્રીજા માળેથી સીધી બેઝમેન્ટમાં પડી હતી. જોકે, સદનસીબે તમામનો આબાદ બચાવ થયો છે. આ ઘટનામાં ત્રણ લોકોને સામાન્ય ઈજાઓ થઈ છે. સ્થાનિકોએ તાત્કાલિક તમામ લોકોનું રેસ્ક્યૂ કરીને બહાર કાઢ્યા હતા.

અમદાવાદના નરોડા વિસ્તારમાં આવેલા દેવાશિષ ફ્લેટમાં ત્રીજા માળેથી લિફ્ટ સીધી બેઝમેન્ટમાં પડી હોવાની ઘટના બની હતી. લિફ્ટમાં બે બાળકો, ચાર મહિલાઓ અને એક પુરુષ એમ સાત લોકો ફસાયા હતા. સ્થાનિક લોકો તાત્કાલિક દોડી આવ્યા હતા અને લિફ્ટનો દરવાજો તોડી તમામ લોકોને બહાર કાઢ્યા હતા. સ્થાનિક લોકોએ લિફ્ટના મેન્ટેનન્સને લઈને સવાલો ઉભા કર્યા હતા. ચોથા માળેથી તેઓ નીચે આવી રહ્યા હતા ત્યારે ત્રીજા માળ બાદ અચાનક જ લિફ્ટ સીધી બેઝમેન્ટમાં પડી હતી.

આ ઘટનાની જાણ થતા સ્થાનિક લોકો તાત્કાલિક નીચે દોડી આવ્યા હતા. લિફ્ટનો દરવાજો થોડો ખુલ્લો હતો,જેના કારણે લોકોએ દરવાજાને તોડી અને ત્રણ જ મિનિટમાં તમામ લોકોને સહી સલામત બહાર કાઢી લીધા હતા. આ ઘટનામાં કોઈ મોટી જાનહાનિ થઈ નથી, પરંતુ લિફ્ટમાં ફસાયેલી ચાર મહિલાઓ અને બાળકો ખૂબ જ ગભરાઈ ગયા હતા.