ભરૂચ શહેરના મહાત્મા ગાંધી રોડ ઉપર આવેલા વસંત મિલની ચાલના સ્લમ વિસ્તારમાં એક સામાન્ય પરિવારમાંથી આવતા જય સોલંકીએ મોડલિંગની શરૂઆત સૌપ્રથમ વડોદરા શહેરમાંથી શરૂ કરી મિસ્ટર ગુજરાત-૨૦૧૭નો ખિતાબ પ્રાપ્ત કર્યો હતો. જોકે, આ ખિતાબ પ્રાપ્ત કર્યા બાદ જય સોલંકીને સૌપ્રથમ રાજસ્થાની પ્રીતિ કેસેટની કંપનીમાં કામ કરવાનો મોકો મળ્યો, અને ત્યારબાદ રાજસ્થાન અને આણંદ બન્ને જિલ્લાના પ્રોડ્યુસરોએ ભેગા મળી ગુજરાતી આલ્બમ સોંગ લવ્યુ જાનુ તૈયાર કર્યું હતું.

જેમાં જય સોલંકીને ગાવાનો મોકો મળ્યો અને ત્યારબાદ હાલમાં જ જય સોલંકીને અમદાવાદના ખોડલ વિડીયોમાંથી પંચમહાલના સુપર ટીમલી કિંગ સિંગર રાકેશ રાવળનું મળતા હવે મળાતું નથી સોંગ મળ્યું છે. જોકે, આ સોંગ પણ ટૂંક જ સમયમાં રજૂ થનાર છે. જય સોલંકી આગામી દિવસોમાં ગુજરાતી ફિલ્મ જગતમાં પણ પોતાની ભૂમિકા ભજવનાર હોવાનું જણાવી રહ્યો છે, ત્યારે સ્લમ વિસ્તારના જય સોલંકીએ ટૂંકી સફરમાં શ્રેષ્ઠ મોડલિંગ તથા સિંગર તરીકે એવોર્ડ અને સન્માન પત્ર પ્રાપ્ત કરી ભરૂચ જિલ્લાનું નામ રોશન કર્યું છે.