ભરૂચ : ઝઘડિયાના સારસા ગામ પાસે રોંગ સાઈડ આવતા વાહનોના પગલે અકસ્માત

ભરૂચ જિલ્લાના ઝઘડિયા તાલુકાના સારસા ગામ નજીક આજરોજ સવારે 9 કલાકે ટેમ્પો ચાલકે એક રાહદારીને અડફેટે લેતા અકસ્માત સર્જાયો હતો,રોંગ સાઈડ પરથી દોડતા વાહનોના પગલે સર્જાતા અકસ્માત સામે સ્થાનિક લોકોએ આક્રોશ વ્યક્ત કર્યો હતો,અને ખોટી સાઈડ પર દોડતા વાહનોને અટકાવીને પરત સાચી દિશામાં જવા માટે ફરજ પાડી હતી.

ભરૂચ જિલ્લાના ઝઘડિયા તાલુકાના ઉમલ્લા તરફથી એક થ્રી વ્હીલર ટેમ્પો ચાલક રાજપારડી તરફ જઈ રહ્યો હતો,તે સમયે સારસા ગામ નજીક એક વ્યક્તિ રોડ ક્રોસ કરી રહ્યો હતો.ત્યારે  ટેમ્પો ચાલકે રોડ પરથી પસાર થઈ રહેલ એક રાહદારીને અડફેટે લેતા અકસ્માત સર્જાયો હતો, અકસ્માતનો ભોગ બનનાર ઈજાગ્રસ્તને 108 એમ્બ્યુલન્સ દ્વારા ઉમલ્લા સામૂહિક આરોગ્ય કેન્દ્ર ખાતે ખસેડવામાં આવ્યો હતો, ઘટના સ્થળ પર હાજર લોકો દ્વારા આ ટેમ્પો ચાલક રોંગ સાઈડ પરથી પસાર થઈ રહ્યો હોવાના આક્ષેપ કરવામાં આવ્યા હતા.જેથી  સ્થાનિકો દ્વારા રોંગ સાઈડ પર આવતા વાહન ચાલકો સામે આક્રોશ વ્યક્ત કરીને વાહનોને અટકાવી દીધા હતા. અને સાચી દિશામાં રોડ પરથી પસાર થવા માટે ફરજ પાડી હતી.આ ઉપરાંત સારસા ગામના રહીશો દ્વારા જણાવવામાં આવ્યું હતું કે આ જગ્યા ઉપર વારંવાર  નાના-મોટા અકસ્માત સર્જાય છે, તેથી માર્ગ પર સ્પીડ બ્રેકર બનાવવાની માંગ કરી હતી.