અંકલેશ્વર હાંસોટ રોડ પર ફરી એકવાર ગમખ્વાર માર્ગ અકસ્માત સર્જાયો હતો. અંકલેશ્વરના એશિયાડ નગર નજીક પૂરઝડપે જતી ટ્રકની ટકકરે બાઇક સવાર એક યુવાનનું મોત નીપજ્યું હતું જ્યારે અન્ય યુવાનને ઇજા પહોંચી હતી

અંકલેશ્વર હાંસોટ રોડ પર અકસ્માતનો વધુ એક બનાવ સામે આવ્યો છે. જેમાં યુવાને જીવ ગુમાવવાનો વારો આવ્યો છે. હાંસોટના રામનગરમાં રહેતા 25 વર્ષીય આનંદ મિસ્ત્રી અને તેનો મિત્ર પ્રશાંત મિસ્ત્રી બાઈક પર અંકલેશ્વર ઔદ્યોગિક વસાહતમાં વહેલી સવારે નોકરીએ જઈ રહ્યા હતા તે દરમિયાન એશિયાડ નગર નજીક પુરઝડપે જતી ટ્રકના ચાલકે બાઈકને ટક્કર મારી હતી. જેમાં બંને યુવાનો માર્ગ પર પટકાયા હતા. આ અકસ્માતમાં આનંદ મિસ્ત્રીને ગંભીર ઈજા પહોંચતા તેનું ઘટના સ્થળે જ કમકમાટી ભર્યું મોત નિપજ્યું હતું જ્યારે પ્રશાંત મિસ્ત્રીને પગના ભાગે ઈજા પહોંચી હતી. આ અંગેની જાણ થતા લોકોના ટોળા ભેગા થઈ ગયા હતા. તો બીજી તરફ એ ડિવિઝન પોલીસનો કાફલો પણ ઘટના સ્થળે દોડી આવ્યો હતો અને 108 એમ્બ્યુલન્સ સેવાની મદદથી ઇજાગ્રસ્ત યુવાનને સારવાર અર્થે ખસેડવામાં આવ્યો છે.એ ડિવિઝન પોલીસે  ટ્રક ચાલક વિરુદ્ધ ગુનો નોંધી કાયદેસરની કાર્યવાહી હાથ ધરી છે.