અંકલેશ્વર: GIDCના રહેણાંક વિસ્તારમાં દબાણ હટાવો ઝુંબેશ શરૂ કરાશે,ટ્રાફિકજામની વકરી રહી છે સમસ્યા

અંકલેશ્વર ઔદ્યોગિક વસાહતના રહેણાંક વિસ્તારમાં સર્જાતી ટ્રાફિકજામની પરિસ્થિતિના નિરાકરણ માટે અંકલેશ્વર ઉદ્યોગ મંડળ દ્વારા દબાણ હટાવો ઝુંબેશ શરૂ કરવામાં આવશે

એશિયાની સૌથી મોટી ઔદ્યોગિક વસાહત એવી અંકલેશ્વર જીઆઇડીસીના રહેણાંક વિસ્તારમાં ટ્રાફિકજામની સમસ્યા દિન પ્રતિદિન વકરી રહી છે. ખાસ કરીને શનિ અને રવિવારના રોજ ટ્રાફિકજામના કારણે અનેક વાહન ચાલકો હેરાન પરેશાન થાય છે.

શનિવારી બજારના કારણે જીઆઇડીસીના મુખ્ય માર્ગો પર વાહનોની કતાર લાગે છે ત્યારે આ અંગેની ફરિયાદ અંકલેશ્વર ઉદ્યોગ મંડળને મળતા ઉદ્યોગ મંડળ દ્વારા આગામી દિવસોમાં દબાણ હટાવો ઝુંબેશ શરૂ કરવામાં આવશે. શનિવારી બજારમાં તેમજ અન્ય દિવસોમાં પણ મુખ્ય માર્ગને ઉભા કરાયેલા હટાવવામાં આવશે અને માર્ગ ખુલ્લો કરાશે જેનાથી ટ્રાફિક જામની સમસ્યા પર અંકુશ મેળવાશે તેવો આશાવાદ સેવાય રહ્યો છે..