મનને શાંતિ અને આંખોને ઠંડક આપતું ગાંધીનગરનું લેક ગાર્ડન, પ્રકૃતિ સાથે જોડાવવાનું એક ઉત્તમ સ્થળ........

શહેરને હર્યું ભર્યું રાખવામાં બગીચાઓનો ખૂબ મોટો હાથ હોય છે. ગાંધીનગરના દરેક સેકટરમાં નયનરમ્ય બાગ બગીચાઓ બનાવવામાં આવે છે. આ ઉપરાંત ઉદ્યોગ ભવન, નવા અને જૂના સચિવાલય, સરકારી કચેરી તેમજ મંત્રી નિવાસમાં કુલ 100થી વધુ નાના-મોટા બગીચાઓ આવેલા છે. જે પૈકી સૂર્યજ્યોત લેક ગાર્ડન પણ ખૂબ જાણીતું પાર્ક છે. સૂર્યજ્યોત લેક ગાર્ડન સેક્ટર-1માં આવેલું છે, આ ગાર્ડન ખૂબ સુંદર અને રમણીય છે. જો તમે ગાંધીનગરમાં રહો છો અને તમે આ સૂર્યજ્યોત પાર્કની મુલાકાત નથી કરી, તો તમારી મુલાકાત અધૂરી ગણાશે.

આ પાર્ક ખરેખર મન મોહી લે તેવું છે. આ લેક ગાર્ડનમાં લીલાછમ ઘાસ, છાયડાંવાળો વિસ્તાર અને ચાલવા માટે સુંદર પગદંડીઓ આવેલી છે. આ ઉપરાંત અહીં આવતા લોકોના બેસવા માટે સુંદર બાંકડાની પણ વ્યવસ્થા કરવામાં આવી છે. આ ગાર્ડનની વચ્ચોવચ આવેલું તળાવ અને તળાવની ફરતેનું પ્રાકૃતિક સૌંદર્ય ખરેખર જોવાલાયક છે. અહીનું હર્યુંભર્યું વાતાવરણ મનને શાંતિ અને આંખોને ઠંડક આપે છે. લોકો દૂર-દૂરથી અહીં ક્વોલિટી ટાઇમ પસાર કરવા આવે છે. આ પાર્કમાં પરિવાર તથા મિત્રો સાથે પિકનિકની મજા પણ માણી શકાય છે, સ્વચ્છ વાતાવરણમાં પિકનિકનો આનંદ માણવા આ શ્રેષ્ઠ સ્થળ છે. ગાર્ડનની બહાર સુંદર પાર્કિંગની સુવિધા પણ છે. તે સિવાય વોલીબોલ કોર્ટ, પિકનિક ટેબલ અને અન્ય સુવિધાઓ આવેલી છે.