• ગુજરાત રાજ્યમાં સત્તાવાર રીતે ચોમાસાની એન્ટ્રી થઈ ગઈ

• આગામી 7 દિવસ વરસાદને લઈ હવામાન વિભાગમી આગાહી

• નવસારી, વલસાડ અને વાપી પંથકમાં ભારે વરસાદ વરસ્યો

• ઠેર ઠેર વરસાદી પાણી ભરાય જતાં જનજીવન અસ્તવ્યસ્ત થયું

• કેટલાક નીચાણવાળા વિસ્તારોમાંNDRFની ટીમ સ્ટેન્ડબાય

રાજ્યમાં સત્તાવાર રીતે ચોમાસાની એન્ટ્રી થઈ ગઈ છે. હવામાન વિભાગે આગામી 7 દિવસ રાજ્યમાં વરસાદને લઈને આગાહી કરી છે, ત્યારે દક્ષિણ ગુજરાતના નવસારી, વલસાડ અને વાપીમાં ભારે વરસાદ વરસ્યો હતો. જેના કારણે જનજીવન અસ્તવ્યસ્ત થયું હતું.

રાજ્યમાં ચોમાસાની વિધિવત્ શરૂઆત સાથે જ ગત મોડીરાતે વીજળીના કડાકાભડાકા સાથે ધોધમાર વરસાદ શરૂ થયો હતો. આ તરફ, દક્ષિણ ગુજરાતના નવસારી, વલસાડ, વાપી અને ડાંગમાં રેડ એલર્ટ અપાયું છે. વહેલી સવારથી જ નવસારી જિલ્લામાં વરસાદી માહોલ જામ્યો છે. ધીમીધારે વરસાદ યથાવત રહેતા ઉપરવાસ સહિત અંબિકા, કાવેરી અને પૂર્ણા નદીમાં નવા નીરનું આગમન થયું છે, જ્યારે સુપા ગામને કુરેલ સાથે જોડતો લો-લેવલ બ્રિજ પાણીમાં ગરકાવ થયો થતાં 5 ગામના લોકોને 10 કિમીનો ચકરાવો લેવાની ફરજ પડી હતી. તો બીજી તરફ, નવસારી જિલ્લામાં છેલ્લા 2 દિવસથી દેમાર વરસાદના પગલે વહીવટી તંત્ર એલર્ટ મોડમાં આવી ગયું છે. નવસારીમાં 24 સભ્યોનીSDRF ટીમને ડિપ્લોય કરવામાં આવી છે. જે તમામ બચાવના ઉપકરણો સાથે નવસારીમાં તૈનાત રહેશે, અને કોઈપણ આપાતકાલીન પરિસ્થિતિને પહોંચી વળશે.

વલસાડ જિલ્લામાં પણ વરસેલા ભારે વરસાદે ઠેર ઠેર તારાજી સર્જી દીધી છે. વલસાડમાંથી પસાર થતા નેશનલ હાઈવે નં. 48 પર ચોમાસાની શરૂઆતમાં જ મોટા ખાડાઓ પડ્યા છે. આ રસ્તા પર માત્ર થોડા મહિના પહેલા જ ડામર કામ કરવામાં આવ્યું હતું. સામાન્ય વરસાદમાં જ રસ્તાની સ્થિતિ બગડતા હાઈવે ઓથોરિટીની કામગીરી સામે પ્રશ્નો ઉઠ્યા છે. પાણી નિકાલની અવ્યવસ્થાના કારણે વલસાડના ઉદવાડા-બગવાડા વચ્ચેનો માર્ગ પણ પાણીમાં ગરકાવ થઈ ગયો હતો, જ્યાં લોકો પોતાના જીવના જોખમે પાણીમાંથી પસાર થવા મજબૂર બન્યા હતા.

આ તરફ, વલસાડની ઔરંગા નદી પોતાની ભયજનક સપાટી વટાવી 4.55 મીટરએ વહી રહી છે. જેના કારણે વલસાડ નગરપાલિકાનો વોટર વોક્સ ડેમ પણ ઓવર ફ્લો થયો હતો. તો બીજી તરફ, વલસાડના વાપી મનપાની બેદરકારીનો વધુ એક પુરાવો સામે આવ્યો છે. વાપીમાં વોક-વે માટે બનાવેલ અંડર બ્રિજમાં પણ વરસાદી પાણી ભરાતા લોકોને હાલાકીનો સામનો કરવો પડ્યો હતો, જ્યારે પહેલા વરસાદે જ વાપી મોડલ રેલવે સ્ટેશનની હાલત ખરાબ કરી નાખી છે. વાપી રેલવે સ્ટેશને મુસાફરોએ ક્યાં ઉભું રહેવું એ જગ્યા શોધવી મુશ્કેલ બન્યું હતું. સ્ટેશન પર મહત્તમ જગ્યા પરથી પાણી પડવા લાગ્યું હતું. ખૂબ મોટી સંખ્યામાં વાપી ખાતે નોકરી કરતો વર્ગ રેલવે સ્ટેશનનો ઉપયોગ કરતો હોય છે, જ્યાં મુસાફરોએ છત્રી અને રેઇનકોટ સાથે રેલવે પ્લેટફોર્મ પર ઉભા રહેવા મજબુર બન્યા હતા. વલસાડ જિલ્લામાં ઉપરવાસમાં ભારે વરસાદના કારણે તમામ નદીઓ બે કાંઠે વહેવા લાગી છે. વલસાડ જિલ્લા કલેક્ટર સહિતNDRFની ટીમએ નદીના તટવિસ્તાર તેમજ નીચાણવાળા વિસ્તારોમાં સ્થળ નિરીક્ષણ કરી લોકોને તકેદારી રાખવા એલર્ટ કર્યાં છે.