નવસારી : બંધ પડેલી મિલમાંથી શંકાસ્પદ હાલતમાં મહિલાનો મૃતદેહ મળી આવ્યો, FSL-ડોગ સ્ક્વોર્ડની મદદથી પોલીસ તપાસ શરૂ...

• બંધ પડેલી મિલમાંથી મહિલાનો મૃતદેહ મળતા ચકચાર

• શંકાસ્પદ હાલતમાં મહિલાનો મૃતદેહ મળતા પોલીસ દોડી

• દુષ્કર્મ બાદ મહિલાની હત્યા કરી હોવાની પોલીસને શંકા

• FSL અને ડોગ સ્ક્વોર્ડની મદદથી વધુ તપાસ હાથ ધરાય

• પોલીસે પેનલ પોસ્ટમોર્ટમ કરાવવાની તજવીજ હાથ ધરી

નવસારી નજીક હાઈવે પર બંધ પડેલી મિલમાંથી શંકાસ્પદ હાલતમાં મહિલાનો મૃતદેહ મળી આવતા પોલીસે FSL અને ડોગ સ્ક્વોર્ડની મદદથી વધુ તપાસ હાથ ધરી છે.

નવસારી નજીક હાઈવે પર આવેલી વર્ષોથી બંધ પડેલી 'મહા આશા રાઈસ મિલ’માંથી શંકાસ્પદ હાલતમાં મહિલાનો મૃતદેહ મળી આવતા ચકચાર મચી જવા પામી છે, જ્યાં લઘુશંકા માટે આવેલા એક વ્યક્તિને લોહીલુહાણ હાલતમાં મહિલાનો મૃતદેહ જોતાં જ તેણે તાત્કાલિક પોલીસને જાણ કરી હતી. બનાવની જાણ થતાં જ થતાં જિલ્લા પોલીસ વડા રાહુલ પટેલ સહિત ડીવાયએસપી, ગ્રામ્ય પોલીસ, લોકલ ક્રાઇમ બ્રાન્ચ સહિતનો પોલીસ કાફલો તાત્કાલિક ઘટનાસ્થળે દોડી આવ્યો હતો. પોલીસે FSL અને ડોગ સ્ક્વોર્ડની મદદથી વધુ તપાસ શરૂ કરી છે. પોલીસના મતે, આ બનાવ છેલ્લા 30 કલાકની અંદર બન્યો હોવાની સંભાવના છે.

પ્રાથમિક દ્રષ્ટિએ મૃતક મહિલા સાથે દુષ્કર્મ બાદ તેની હત્યા કરવામાં આવી હોવાની પોલીસે ગંભીર સંભાવના વ્યક્ત કરી છે. મૃતક મહિલા હાઈવે આસપાસ કચરો વીણવાનું કામ કરતી હોવાની પણ પોલીસને આશંકા છે. જોકે, મૃત્યુનું ચોક્કસ કારણ જાણવા માટે પેનલ પોસ્ટમોર્ટમ કરાવવામાં આવશે, જેના રિપોર્ટ બાદ આગળની કલમો હેઠળ કાર્યવાહી કરાશે, ત્યારે હાલ તો પોલીસે મહિલાની ઓળખ કરવા માટેની તજવીજ શરૂ કરી છે.