સુરત : રૂ. 2 હજારની લેતીદેતીમાં યુવકને માર મારનાર શખ્સોની કરાય ધરપકડ

સુરત શહેરના પાંડેસરા વિસ્તારમાં માત્ર 2 હજાર રૂપિયાની લેતીદેતીમાં 4 લોકોએ એક યુવકને તેના ઘરેથી ઉંચકી લાવીને થાંભલા સાથે બાંધી માર માર્યો હતો. યુવકને થાંબલા સાથે બાંધીને માર મારતા હોવાનો વીડિયો સોશિયલ મીડિયા પર ખૂબ વાયરલ થયો હતો. જોકે, વીડિયો વાયરલ થતાં પાંડેસરા પોલીસ દોડતી થઈ હતી. જેમાં પીડિત યુવકે પાંડેસરા પોલીસ મથકે ફરિયાદ નોંધાવી હતી. જેના પગલે પોલીસે ચારેય શખ્સોની ધરપકડ કરી હતી.

પાંડેસરા ખાતે આવેલા જય અંબે નગર સોસાયટીમાં રહેતા રોહિત નામના યુવકે 6 મહિના પહેલા રૂપિયા 2 હજારની રકમ દીપક નામના શખ્સ પાસેથી ઉછીની લીધી હતી. આ રકમ રોહિત આપી ન શકતા દીપક અને તેના સાગરિતોએ ગત 14મી તારીખે મોડીરાતે રોહિતને ઊંચકી લાવી અર્ધનગ્ન કરી થાંભલા સાથે બાંધીને માર માર્યો હતો. લગભગ એકાદ કલાક સુધી આરોપીઓએ તેને બાંધી રાખ્યો હતો. રોહિતે આજીજી કરી છતાં ચારેય શખ્સોએ તેની વાત ન માનીને માર માર્યો હતો. આ બનાવ અંગે પાંડેસરા પોલીસમાં રોહિતે ફરિયાદ આપી હતી, જેના આધારે પોલીસે મારામારી, કર્ફયુ ભંગ સહિતની કલમો હેઠળ ગુન્હો નોંધી સન્ની, આકાશ, દીપક અને અરવિંદ નામના શખ્સોને ઝડપી તમામ વિરુદ્ધ કાયદેસરની કાર્યવાહી હાથ ધરી છે.