પ્રાંતિજ ટોલટેક્સ પાસેથી ગેસના બોટલ ભરેલ ટેમ્પાએ મારી પલ્ટી,પુરવઠા વિભાગે ગેસ સિલિન્ડર કર્યા જપ્ત

પ્રાપ્ત માહિતી અનુસાર મોડાસાના ખોડબા હાઇવે ઉપર આવેલ ન્યુન ગેસ એજન્સી માંથી રાંધણ ગેસ સિલિન્ડર ભરીને ટેમ્પો ચાલક ઓવર સ્પીડમાં ટેમ્પો હંકારી અમદાવાદ તરફ જઈ રહ્યો હતો, તે દરમ્યાન પ્રાંતિજ ના ટોલટેક્સ નજીક ટેમ્પો ચાલકે સ્ટિયરિંગ પરથી કાબુ ગુમાવતા પલ્ટી ખાઇ ગયુ હતુ. સર્જાયેલા અકસ્માતમાં ચાલકનો આબાદ બચાવ થયો હતો. 

ઘટના અંગેની જાણ જિલ્લા પુરવઠા મામલતદારને થતા તેઓએ પ્રાંતિજ મામલતદારને જાણ કરી હતી.અને પુરવઠા અધિકારીની ટીમ ઘટના સ્થળે દોડી ગઈ હતી અને સ્થળ ઉપર જઈને તપાસ કરતા બીલ વાળા ગેસ સિલિન્ડર હતા પરંતુ ગેસની બોટલ માટે નુ સ્પેશિયલ વાહન એટલે કે  એલપીજી વાહન ના હોય અન્ય વાહન મારફતે ૭૮ બોટલ લઈ જવામાં આવી રહયા હોવાનું જાણવા મળ્યું હતું.તેથી પુરવઠા વિભાગ દ્વારા કાયદેસરની કાર્યવાહી હાથધરી હતી. અને ટેમ્પો જેની કિંમત રૂપિયા ૧ લાખ ૫૦ હજાર તથા ટેમ્પામાં રહેલ ૭૮ સિલિન્ડર મળી કુલ રૂપિયા ૩ લાખ ૭૩ હજારનો મુદ્દામાલ સીઝ કરી આગળની કાયદેસરની કાર્યવાહી હાથધરી હતી.