વલસાડ : કપરાડાના વારણા ગામમાં બે યુવતીઓએ એક જ ઝાડ અને દોરીથી ફાંસો ખાઈને આપઘાત કરી લેતા અરેરાટી વ્યાપી

• કપરાડામાં બે યુવતીઓના રહસ્યમય આપઘાત

• એક ઝાડ અને એક દોરીથી ગળે ફાંસો ખાધો

• ઘટનાને પગલે પંથકમાં મચી સનસનાટી

• બંને યુવતીઓ એક જ કંપનીમાં કરતી હતી કામ

• પોલીસે ઘટનાનો ભેદ ઉકેલવા માટે શરૂ કરી કવાયત

વલસાડ જિલ્લાના કપરાડા તાલુકાના છેવાડે આવેલા વારણા ગામ નજીક  એક ચકચારી ઘટના પ્રકાશમાં આવી હતી.એક ઝાડ પર એક જ દોરીથી બે યુવતીઓના ગળે ફાંસો ખાધેલી હાલતમાં મૃતદેહ મળી આવતા સનસનાટી મચી ગઈ હતી.ઘટના અંગે પોલીસ દ્વારા ઉંડાણપૂર્વક તપાસ હાથ ધરી હતી.

વલસાડ જિલ્લાના કપરાડા તાલુકાના વારણા ગામ અને જીરવલ ગામની હદ પર એક જ દોરી પર બે યુવતીઓનો ગળે ફાંસો ખાધેલી  હાલતમાં મૃતદેહ મળી આવ્યા હતા. ગ્રામજનો આ દ્રશ્ય જોતા સમગ્ર પંથકમાં ચકચાર મચી ગઈ હતી.બનાવની જાણ થતા જ મોટી સંખ્યામાં સ્થાનિકોનું ટોળું એકઠું થયું હતું. અને આ અંગે પોલીસને જાણ કરી હતી.ઘટનાની જાણ થતા જ કપરાડાના નાનાપોંઢા પોલીસની ટીમ સ્થળ પર પહોંચી હતી.અને ઉંડાણપૂર્વક તપાસ શરૂ કરી હતી.પ્રાથમિક તપાસમાં મૃતક યુવતીઓમાં એક યુવતી નીલોસી ગામ અને એક યુવતી કેતકી ગામની હોવાનું બહાર આવ્યું છે. આ બંને યુવતીઓ મિત્ર હતી.અને દાદરાની એક કંપનીમાં સાથે કામ કરતી હોવાનું બહાર આવી રહ્યું છે.

આ રહસ્યમય આપઘાત અંગેની જાણકારી મળતા જ  નાનાપોંઢા પોલીસની ટીમ સ્થળ પર પહોંચી હતી.અને બંને મૃતક યુવતીઓની ઓળખ કરી હતી.જેમાં અંજના લક્ષીભાઈ અને  નીલોસી ગામની નીતા હોવાનું બહાર આવ્યું છે.બંનેની ઓળખ થતા જ પોલીસે બંને મૃતક યુવતીઓના પરિવારજનોને જાણ કરી હતી.અને સ્થાનિક લોકોની હાજરીમાં બંનેના મુદ્દે નીચે ઉતારી મૃતદેહનો કબજો લઈ પોસ્ટમોર્ટમ સહિતની કાર્યવાહી હાથ ધરી હતી. જોકે ઝાડની ડાળીએ એક જ દોરીથી બંને યુવતીઓ એક સાથે ગળે ફાંસો ખાધેલી હાલતમાં મળી આવતા અનેક સવાલો ઉભા થઈ રહ્યા છે. આ યુવતીઓએ આપઘાત કર્યો છે કે તેમના મોતનું કોઈ અન્ય કારણ છે.તેનું રહસ્ય ઘેરાયું છે.અને પોલીસે આ મામલે મૃતકના પરિવારજનો અને સાથે કામ કરતા અન્ય સહકર્મીઓની સાથે આસપાસના લોકોની પણ પૂછપરછ હાથ ધરી ઘટનાનો ભેદ ઉકેલવા માટેના ચક્રો ગતિમાન કર્યા છે.